ONLINE nga meeting, session, hearing ug daghan pang gimbuhaton ang atong nasaksihan sukad nagsugod ang estriktong pagpatuman sa mga protocol nga may kalabutan sa gubat batok Covid-19.
Tungod kay gidili ang face to face ug mass gathering, pinaagi sa online gamit ang nagkadaiyang platform nilampos sa ilang tuyo ang mga hingtungdan.
Ang zoom maoy usa nga gikalingawan karon. Ug mao ni nahitabo atol sa ika-25 ka tuig nga kasumaran sa pagkatukod sa sibyaanan nga DYAB sa ABS-CBN. Lahi ang kasaulogan niadtong Biyernes, Hunyo 12, itandi sa nangaging katuigan.
Sayod naman siguro mo nga lakip kini sa order sa National Telecommunications Commission pagpaundang sa sibya niadtong Mayo 5 tungod sa isyu sa prangkisa. Human ma-shutdown gipadayon ang sibya pinaagi sa online ug Sky Cable. Limitado hinuon ang mga kalihukan atol sa anibersaryo.
Ang labing makasaysayanon mao kadtong reunion sa mga anchor sa kanhiay nga panahon ug ang mga nagpadayon pa sa pagsibya hangtod karon. Isip usa sa mga program handler nakasalmot ko nianang pagka gabii pinaagi sa linya sa telepono. Kadaghanan sa nisalmot pagpaambit sa ilang mga kasinatian gipaagi sa zoom.
Ingon niana ka high tech ang atong panahon karon. Magtabi sa kahanginan nga apil ang video. Si Leo Lastimosa, ang nagsilbi nga anchor, emcee ug moderator. Pero lahi gyud kaayo itandi sa naandan sa wala pa ning problema sa coronavirus. Face to face gyud maoy pinaka nindot sa tanan.
Usa sa nisalmot ang kanhi anchor ang Pardohanon nga si Tisha Ylaya nga nailhan sa kahanginan nga Inday Tikay. Iyang gipahibalo nga sukad nga nawala siya sa kahanginan iyang gitutukan ang pagdumala sa iyang English school dinhi sa Sugbo. Mao man gyud ni ang iyang linya, ang academe.
Ug usa sa iyang gipahibalo mao ang iyang tinguha nga makatabang sa atong mga magtutudlo sa mga publikong eskwelahan ning panahon sa pandemya. Di ba ang DepEd nagtinguha man nga mosagop sa online classes? May libreng online session nga gitanyag si Inday Tikay alang kanila matag alas 2 ngadto sa alas 5 sa hapon.
Sama niining mosunod: navigating zooms, presentation skills, public speaking, grammar 101 ug pronunciation 101. Sa mga public school teachers nga gustong mopahimulos niining libreng on line session makig-alayon lang sa Swift English Academy https://bit.ly/sea.
Sa uban nga dunay gustong itampo nga libre sa atong mga magtutudlo, ato silang gidasig sa pagpaambit niini ning panahon sa new normal nga atong gisagubang karon.
***
Si Steve Gabiana usa sa mga barbero dinhi sa ato, nitug-an nako sa iyang unang adlaw sa pagbalik niya panupi niadtong Sabado. Matod niya, walo ra gyud ka kustomer ang nasaag sa barberohan nga iyang gialagaran. Tumang pag-amping pagtuman sa mga protocol ang iyang gibuhat.
Sa iyang napanid-an, ang mga kutomer nibati gyud og kabalaka a kahadlok nga matakdan. Ug mao ni hinungdan ngano nga nagmingaw ang iyang barberohan. Sa pikas nga bahin, si Roy Banuela ug ang ka live-in nga si Linz niasoy nako sa daghang hagit nga ilang nasugatan ning bag-o nilang panginabuhi. Kaniadto si Roy kargador sa Pasil fish market.
Karon nanuroy na og isda gamit ang iyang trisikad. Nagpasalamat sila nga dunay financier nga maoy mobayad sa isda nga ilang isuroy. Dunay patung apan di sab hinuon dako. Pananglit ang usa ka banyerang isda nga mokantidad og P3,000, P200 ngadto sa P300 ang patung sa financier nga ilang bayran pagka ugma.
Gikan sa pagka kargador og isda, karon mokarga gihapon og isda apan mao nay mangunay og baligya. Panginabuhi nga gipugos pagkat-on ning panahon sa pandemya.