KANUS-A si Gibo Teodoro mahigmata sa kamatuoran nga dili siya ang tinood nga kandidato sa administrasyon?

Way nasayod hangtud kanus-a siya magpuyo sa kalibutan sa ilusyon karon nga hinay-hinay na nga namiya gikan sa gipasigarbo nga dakong barko nga gitawag ug Palaka (Partido Lakas Kampi) ang  mga kanhi nisaad nga moduyog kaniya hangtod sa katapusan.

"The Manny Pacquiao Blog". Click here for stories and updates on the Filipino boxing champ.

Kanang burit nga “Cebu is a Gibo country” pabuhi na lang na sa dugo, way kalainan sa pasiatab ni Eddie Gullas nga kuno ang Cebu maoy mohatud sa iyang kandidato ngadto sa Malacanang.

Tingali – kung robot ang taga Sugbo! Pasiatab sa usa ka trapo ang gihimo ni EddieGul. Dili man tanan, apan daghan sa mga nagpaluyo sa iyang kandidato mga oportunista nga naglaway nga naghuwat sa funding o salapi, apan way plano nga mokrusada alang sa ilang kandidato.      

Nahisama usab si Gwen Garcia sa usa ka tingog sa kamingayawan (o tingog sa pagpakaaron-ingnon?) dihang siya nipasalig nga lig-on lang gihapon ang One Cebu nga mopaluyo kang Gibo.

Iyang nakalimtan nga kadtong mga kongresista nga mibali ug mopaluyo sa usa ka sapian nga kandidato manguhit gayud sa mga mayor kansang

bugtong gihunahuna mao ra usab ang kaugalingon nilang mga liog.

Angayan kitang masayod nga nausab na ang kamada sa pulitika kung itandi niadtong 2004. Daghan na kaayo ang nahitabo.

Niadtong 2004, daghan sa middle class ang nahadlok nga modaog si Fernando Poe, Jr (FPJ), busa ilang gipili si Arroyo bisan pa man dili sila siento porsiento nga kombinsido. Sobra ang kompyansa sa kampo ni FPJ mao nga wa silay lig-on nag lider sa syudad ug sa probinsya. Niadtong higayona si Arroyo wa pa kaayo magkabulingit sa mga eskandalo sa korapsyon, ug ang probinsya wa pay eskandalo sa pagpalit ug yuta ilawom sa dagat nga nikantidad ug hapit 100 ka milyon ka pesos. (Ipagawas kuno karong semanaha ang resulta sa imbestigasyon sa Balili aron duna pay panahon maghinulsol ang mga kawatan. Hehehe)

Daghan usab ang di malimot nga si Gibo ang nangu aron ma-impeach ang pinalangga ug  ligdong nga anak sa Sugbo nga si kanhi Chief Justice Hilario Davide. Ang bugtong motibo ni Gibo mao ang iyang kasibot nga panalipdan ang negosyo ni Danding Cojuanco. Nibaha ang mga katawhan diha sa Fuente Osmena aron ikondina ang yawan-on nga lakang batok sa amahan ni Hilario Davide III. Intelehenti ang mga taga Sugbo ug dili tanga!

Ang mga nagduso sa kandidatura ni Gibo naglaom nga inigka Pebrero mo-double digit na ang iyang rating sa survey. Pakyas sila. Bisan motambong pa siya ug debati matag oras, padayon  siya nga magpas-an, mosugot siya’g sa dili, sa bagahi ni “Hello Garci” Arroyo.

Samtang ang Yellow Army, mga beterano sa pakigbisog nga mosugot lang ug magmonggos-monggos sa kampanya, disidido, diretso, determinado, solido kay alang kanila: “It’s now or never.”