USA ka kinabuhi ang nakalas ug gibana-banang P2 milyunes ang danyos nga gibilin sa sunog sa Barangay Camputhaw, Dakbayan sa Sugbo sa sayo sa kaadlawon sa Lunes, Hunyo 15, 2020.
Ang namatay nga natanggong sa tindahan nga nasunog giila nga si Jerson Ellera, 18, helper. Napalgan siya human sa sunog.
Nabulabog ang kahinanok sa pagkatulog sa mga residente sa Sityo Martinez sa pagkasunog sa four-door apartment ug usa ka tindahan.
Magtiayong tiguwang nga nag-ukopar sa apartment naluwas gikan sa nagdilaab nga estruktura.
Matod ni SFO1 Mariechel Caburnay, imbestigador sa Cebu City Fire Station, dihang nahinabi sa Superbalita Cebu nga ang kayo nagsugod sa apartment nga giukopahan sa usa ka Fe Necesario.
Si Caburnay niila usab sa magtiayon nga sila si Edgar, 68 ug Sylvia Necesario, 65.
Ang magtiayon nakapangayo og pakitabang hinungdan nga daling giluwas sa kabomberohan.
Si Edgar nga nahinabi sa Superbalita Cebu niingon nga siya ug iyang asawa nahinanok pagkatulog dihang nakadungog og kaguliyang sa gawas.
"Akong pagtuo nga dunay nagpinusilay sa gawas. Unya sunog man diay, “ asoy ni Tatay Edgar.
Nadawat ang alarma sa sunog alas 2:47 sa kaadlawon ug gisaka sa second alarm alas 2:59.
Niabot pa kini og third alarm.
Nakontrolar ang sunog alas 3:12 ug gideklarar nga fire out alas 3:57 sa kaadlawon.
Sa pasiunang pakisusi sa kabomberohan, posibleng electrical short circuit ang hinungdan sa kayo, apan ila pang susihon og maayo. (BBT)