SUPERBALITA DAVAO

Roldan: Mag-maskara kita kanunay

Nota Bene

GIPANGKAPOY na mo sa paggamit og face mask o maskara? Mas daghan ang dili gusto ilabi na ang mga babaye kay di na daw magamit ang ilang lipstick ug di na makita ang puti nilang ngipon ug matam-is nga pahiyom.

Apan tungod lagi kay mao may gisugo aron makalikay sa mananakod ug makamatay nga sakit nga Covid-19. Human daw sa pandemic ug moabot na ang "new normal" o ang bag-ong naandan, kinahanglan nang mag-maskara kitang tanan ug di na magtapok sama kaniadto.

Mao kini ang resulta sa usa ka bag-ong pagtuon nga gihimo sa Cambridge ug Greenwich Universities sa America. Ingon sa mga researchers nga gikinahanglang magmaskara ang tawo kanunay aron malikayan ang Covid-19 ug sa umaabot pang virus nga sama niini.

Sa pagkatinuod, dili pa mosugot ang mga eksperto sa medisina ug sa matematika nga monaug na kita gikan sa general community quarantine (GCQ) ngadto sa modified general community quarantine (MGCQ) diin daghan nang pwede tugtan.

Matud pa sa UP nga wa pa kita moubos og 1 ang atong "transmission rate" o kakusgon sa pagkuyanap sa sakit busa kung tugtan na unya ang tanang molakaw-lakaw, hayan modaghan pa ang matakdan.

Anaa pa kita sa 1.2 busan moabot pa'g sobra 40,000 ang matakdan og 1,850 ang mamatay hangtod sa katapusan sa Hunyo. Kagahapon gianunsyo ni PRody ang klasipikasyon sa Metro Manila ug Cebu, ug unta makaayo kini sa nasud.

Busa sugyot nila ni Dr. Richard Stutt nga maoy nangulo sa maong pagtuon nga mas dako ang tabang sa pagsul-ob kanunay o 100% sa maskara bisan sa atong pinuy-anan imbis nga gamiton lang nato kini kung may gibati na sa lawas.

Ang nasud sa Taiwan, New Zealand ug uban pa nga gamay ra ang epekto sa Covid-19 adunay estrikto nga paggamit sa maskara sa nawong bisan asa sila moadto.

Dugang pa sa mga researcher nga maayo nga hataas nga lockdown og 100% nga paggamit sa maskara sa nawong sulod sa 18 ka bulan hangtod nga mawala na ang simptomas sa pandemic.

Kung makagamit og surgical mask o kaha ang N95 og KN95 nga face mask mas maayo. Apan kung wala kay mahal, bisan ang ordinaryong klase nga maskara nga ginalabhan pwede na magamit tungod kay ang paglagsik sa laway inig ubo ug paghatsing ang kasagarang paagi sa pagtakod.

Ipadayon gihapon tong physical distancing, pagpanghugas sa kamot gamit ang sabon ug tubig o alcohol, dili pag-adto sa lugar nga daghang mga tawo, ug kung may sakit o bata pa o senior citizen dili moguwa aron dili matakdan.

Ingon sa taga UP nga anaa sa atong mga kamot ang kapaspason ug kahinay sa pagkuyanap sa Covid-19 busa ilang gihangyo ang atong tabang aron masumpo na kining sakit nga wala pay bakuna.

Maayo unta nga masuta nga epektibo ang "virgin coconut oil" nga pangkontra sa virus kay dili mahal ang tambal. Ngano man diay kung magsige ta'g kagod sa lubi ug magtuno aron makakuha og mantika nga maoy tambal sa virus?

Busa amping kanunay mga ka-kuwarantinas aron dili ulahi ang pagmahay!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph