WA TINGALI wa magping-it karon sa kalisud tungod sa krisis. Sa tinuod lang usahay dili nako ganahan mobasa o maminaw og balita kay puros na lang makaguol ang atong mabasahan ug madunggan.
Mas ganahan ko maghanduraw sa mga malipayong adlaw sa dihang nagsugod pa lang ko og suwat sa mao pa lang say pagkahimugso niadto nga Superbalita.
Pagkagaan ug pagkanindot pa sa dagan sa kinabuhi. Bisan tuod og wala pay social media but who cares? Wala man say Covid.
Tuig 1994 ang mga bida pa niadto ang mga radyo, TV, magazines ug mga namunginging ads sa mantalaan. Mao tong panahona nga adto pa ko manguha og balita sa mga magazine ug songhits sa kanhi “Lim’s News and Magazines Center” nga gipanag-iya sa atong higalang si Mrs. Rose Lim sa dalan Colon nga mao pay sentro sa kalingawan.
Paggawas sa cellphone pag-1999 dinhi nauso ang atong mga comment sa text bahin sa Kapuso vs. Kapamilya. Dinhi usab natawo ang atong AC Martin’s Strongest Link nga ang mga texter gikan pa sa mga lagyong probinsiya.
Bisan karon daghan tang mga testimonya nga madawat nga ang ilang nahimong kapikas dinhi ra nila nailaila sa text sa “Dear AC.”
Usa sad tingali mo sa nakadaug sa atong mga promo sama sa mga libreng cassette tapes, CD ug DVD, tshirts, concert tickets, mga Chilen chicharon ug uban pang mga pahalipay gikan sa atong mga sponsor.
Duna sad tay mga pa-contest nga Valentine’s date with the Stagecrew Band. Ang napiling lima ka winners ang naka-date sa Stagecrew sa kanhi Jukebox Resto Bar. Daghan ang nahatagan og mga dinner good for two courtesy sa atong mga higalang resto-bar sama sa Balls Disco, La Chappelle, Harleys, Jerbys nga puros wala na sad.
Atong nadala ang aktres nga si Bea Alonzo sa opisina sa Superbalita sa dihang dili pa kaayo ni sikat courtesy ni Ms. Rosemarie Gaisano.
Silang Nikki Valdez, Barbara Milano, Dionne Monsanto ug kadtong Cebuana nga giingong third party sa break-up ni anhing Rico Yan ug Claudine Barretto maoy pipila lang sa mga na-interbyu nato diha mismo sa Superbalita.
Magpasalamat ko sa ABS-CBN ug GMA-7 kay dili lang kausa kundi sa makadaghang higayon ila kong gipadayon sa ilang mga gingharian sa kaulohan. Sa mga foreign artist nga akong nainterbyu sama sa Michael Learns To Rock, Air Supply, A1, Modern Talking, Julia Fordham, David Pomeranz, daghang salamat.
Sa JSP Ads and Promo nga hangtod karon nagpaluyo nato ug ni Mike Sarthou nga maoy nagdala nako sa concert tour sa Cueshe didto sa Baguio ug Pampanga daghang salamat.
Siguradong dili paigo ang 2 ka pahinang Laysho sa 25 katuig nakong adventure sa Superbalita (33 tanan apil sa akong trabaho sa una sa Sun.Star Daily nga SunStar Cebu na karon). Dili ko ganahan moingon nga goodbye apan ang tanan duna man gyuy kinutuban. Mosugot man tag sa dili apan dinhi na lang sad ko kutob. Kay karong isyuha (Hunyo 16, 2020) mao nay akong katapusan isip entertainment editor sa Superbalita Laysho.
But it’s not totally goodbye kay magpabilin man gihapon ni atong lindog kada Martes. Mabasa sad ko ninyo sa Super Ka! kada-Huwebes. Sa mga suki nga nisuporta nako hangtod karon ug ingon man sa mga nibasa ning atong lindog ning mga gutloa daghan kaayong salamat. Ang importante luwas ug buhi aron magkitakits lang gihapon ta dinhi puhon puhon sa atong Tagming, ming, ming, ming...