NASUDLAN na ngadto sa 3 ka kumpirmadong kaso sa coronavirus disease (Covid-19) ang Misamis Oriental tulo ka bulan gikan gideklarar ang community quarantine sa nasud sa Pilipinas.
Adlawng Sabado atol sa Independence Day, natala ang labing unang positibo sa Covid-19 sa lalawigan kon diin usa kini ka taga lungsod sa Libertad, Misamis Oriental ug karon naadmit sa Northern Mindanao Medical Center (NMMC).
Usa kini ka returning overseas Filipino workers (OFW), 29 anyos nga lalaki gikan sa Saudi Arabia.
Adlawng Sabado, Hunyo 13, gipahibalo sab ni Gingoog City Mayor Erick Cañosa nga duha ang nagpositibo sa ilang siyudad kon diin usa kini ka amahan ug anak niini nga 1 anyos.
Ang nagpositibo usa ka 30 anyos nga lalaki ug lakip sa locally stranded individual (LSI) nga gikan sa Tondo, Manila ug niabot sa siyudad sa Gingoog naidtong Hunyo 11 ug anaa sa City Isolation Unit.
Hunyo 9, nibiyahe kini gikan sa Manila sakay sa barko nga 2GO uban sa asawa ug anak niini nga one year old nga nagpositibo sab sa Covid-19 kon diin ilang resulta migawas niadtong Hunyo 12 sa hapon.
Ngani kuyog kanila ang asawa o inahan sa bata apan gipasalamatan nga nag negatibo ang resulta sa Covid test.
Sa Hunyo 13, ang Gingoog City adunay mokabat 435 ka mga LSI ug 59 nga niabot nga mga OFW. Napulo sab ang natala nga suspek sa Covid ug 4 ang probable case.
Sa maong gidaghanon sa LSI, moabot sab sa 193 ang negatibo sa rapid diagnostic testing nga gihimo.
Matud ni Cañosa nga dili lang angayan nga mabalaka ang katawhan sa Gingoog tungod kay ang duha ka mga nagpositibo wala na nakalakaw-lakaw ug nakapauli sa ilang lugar gikan sa pag-abot kay deretso kini sila nga gidala sa CIU ug kasamtangan nga walay nasinati nga sintomas.
Samtang sa laing bahin sa mga naunang pamahayag una na gisulti ni Misamis Oriental Governor Bambi Emano nga samtang gihugakan na ang lalawigan kay ubos naman sa modified general community quarantine ug sa padayon nga pagpang abot sa mga LSI, iyang gilauman nga masudlan ang lalawigan.
Apan taliwala niini, iyang gipaabot nga dili moundang ang Provincial Task Force for Covid-19 sa pagpaningkamot mapanalipdan ang katawhan sa lalawigan sa pakigbatok niining makamatay nga virus.
"The effort to fight Covid-19 will never stop, the effort will continue but a guarantee, a promise will be another story with the challenges we are facing right now," matud ni Emano.