GIKAN sa 16 nga kumpirmadong kaso sa coronavirus disease (Covid-19) niadtong niaging semana, misaka na ngadto sa 21 ang kumpirmadong kaso human nadugangan og unom ka inibidwal nga nagpositibo sa adlawng Lunes, Hunyo 15, 2020.
Matod ni Dr. Joselito Retuya, ang epidemiologist sa City Health Office, nga ang gikonsidera nga ika 16 ka kaso mao ang usa ka overseas Filipino worker (OFW) nga taga Barangay Bulua kinsa miabot dinhi sa Cagayan de Oro niadtong Marso 12, 2020.
Sa pag-abot niini dinhi sa siyudad, nakakumpleto kini sa iyang 14 ka adlaw nga kwarantinas. Aduna kini farm ug moadtoan og usa ka tindahan sa Kauswagan aron mamalit og gamit sa iyang farm.
Niadtong Hunyo 5, nibisita kini sa pribadong ospital aron magproseso sa iyang rekisitos kay gitawagan kini nga pabalikon na sa Indonesia alang sa iyang trabaho sa lain nasud.
Hunyo 8, niadto kini sa City Health Office ug nilinya kuyog iyang kapikas aron magkuha sa health certificate.
Hunyo 9 niadto sa Cagayan de Oro City Police Office aron magkuha sa travel authority.
Pagka Hunyo 10, nilarga paingon sa Manila sakay sa eroplano ug pagdangat sa kaulohan, gipaubos sa RT-PCR test kay mao man ang usa sa rekisitos aron makalarga.
Apan Hunyo 13, nigawas iyang resulta nga nagpositibo sa Covid-19. Sa pagkakaron, anaa sa usa ka isolation facility sa Pasig City kining nagpositibo, samtang iyang walo ka sakop sa pamilya nga naa sa siyudad ang gi-monitor na.
Matud ni Retuya nga asymptomatic kini apan padayon giobserbahan.
Ang ika 17 ngadto 21 nga kumpirmadong kaso nga nadugang mao ang pamilya sa namatay nga nagpositibo sa Covid-19 diha sa Dabatian St., Barangay Carmen, siyudad sa Cagayan de Oro.
Kini gilangkoban sa usa ka 67 anyos nga lalaki, 38 anyos ug 31 anyos nga igsuon, 25 anyos nga igsuong lalaki ug anak nga 18 anyos.
Sugod pa sa Hunyo 8, anaa na kini sila tanan sa City Isolation Unit ug karon walay nakita nga sintomas apan pabilin nga giobserbahan. Sirado na usab ang area sa Dabatian ug gipaubos sa estriktong pagbantay hangtod karon panahona.
Ang siyudad nagtala na og 21 ka kumpirmadong kaso kon diin 6 ang nakabsan sa kinabuhi, 9 ang aktibo nga kaso kon asa 1 niini naadmit sa Northern Mindanao Medical Center ug 8 niini naa sa CIU ug 6 ang nakarekober.