SAMA sa mga taga Metro Cebu, wala sab diay tubig ang mga molupyo sa lungsod sa Tuburan. Gipadayag kini nila pinaagi sa usa ka rally sa miaging Hunyo 12, 2020 batok sa Savs Tuburan Water Corporation.
Atong nasayran nga daw nailad ang mga opisyal sa lungsod dihang nipirma silag kasabutan nga kining maong korporasyon maoy modumala sa ilang water system sa kondisyon nga mogasto kini aron molambo.
Ang nakaapan kay pagkahuman nga napirmahan ang kasabutan, igo na lang nikolekta ang taga Savs apan walay gipaguwa nga investments.
Sa protesta mismo sa miaging Biyernes, atong masabot nga ang mga opisyal sa lungsod mismo wala makauyon sa gibuhat sa Savs Tuburan Water Corporation.
Alang kanako, binastos na kining gibuhat sa maong korporasyon.
MCWD
Naglaom ang mga molupyo sa Metro Cebu nga masulbad na ang kawalay tubig human giilisdan ni Mayor Edgar Labella ang board sa Metro Cebu Water District (MCWD) kay kuno walay gibuhat ang daan nga board.
Ang sayop sa miaging board kay wala nila gibutyag ang ilang negosasyon tali sa Metro Pacific ug Aboitiz kabahin sa usa ka joint venture aron makatukod og dakong desalination plant diha sa Syudad sa Lapulapu.
Karon, naghisgot ang bag-ong board og mas gamay nga desalination projects diha sa Mactan ug maghimog bag-ong mga deep well. Apan walay klarong detalye gawas sa mga press release sab.
Mas klaro nga proyekto sa MCWD mao ang pag-apod-apod og tubig ginamit ang mga trak nga dunay dagkong karatola nga gikan sa maong kompaniya.
Kataw-anan kay imbes tuyo nato nga moagas ang atong mga gripo 24/7 aron dili na mag-antos sa paghulat og agas sa lawom nga gabii, mag-atang na lang kita sa mga trak sa tubig inig hayag sa adlaw.
Brayt lagi si MCWD chairman of the board Joey Daluz.
NASULBAD
Hinuon, di man sab pulos negatibo ang atong naobserbahan. Tingale duna lay lack of communication. Apan natubag kagahapon sa buntag ang hangyo ni Mary Therese Rigor sa Inayawan nga iyang gipadangat ug gipasa sa Messenger kabahin sa ilang silingan nga namatay.
Si misis, nga maoy Visayas chairperson sa KP, nanawag kang Sec. Mike Dino. Ako kay nanguntak sa chief of staff ni Inayawan Kap Kirk Repollo ug kang Konsehal Dave Tumulak.
Ug dako kaayo ang atong kalipay dihang giingnan kita ni Kons Dave nga ila nang na-address ang problema. Nag-chat sab mi ni Vincie Monterde nga ni-inform kanako nga gabii na sa Dominggo nakahibawo si Kap Repollo ug ilang gilihok dayon kini.
Naa lang gyuy daghang protocol nga makalangay. Apan makalipay ang balita nga nasulbad na.
(@anol_cebu sa Twitter)