MOKABAT P994,500 nga kantidad ang gitunol sa Kapitolyo Probinsyal pinaagi sa buhatan sa Early Childhood Care and Development (ECCD) alang sa mga naningkamot nga mga day care workers gikan sa 726 ka mga day care centers sa 23 ka lungsod ug duha ka siyudad sa Misamis Oriental.
Gibutyag ni Maryden T. Ocot, ang ECCD head, nga gamay lamang kini nga kantidad kon itandi sa sakripisyo nga ilang gihatag sa mga day care workers aron makatoun ang mga kabataan sa lalawigan.
"Kini gamay lamang nga butang kumpara sa inyong gihatag nga dedikasyon ug suporta nga gihatag sa atong kabataan sa lalawigan," matud ni Ocot.
Sa bag-ohay lang nga kasaulogan sa Child Development Worker's Week 2020 nga giselebrar sugod niadtong Hunyo 8, 2020, gibisita sa mga personahe sa ECCD ang tanan day care workers sa kalungsoran ug dinhi ilang gipaabot ang incentives, plaques of appreciation, sertipikasyon, lakip na ang "thank you" card gikan mismo ni Misamis Oriental Governor Bambi Emano.
Gipasabot ni Ocot nga ang P994,500 nga kantidad alang sa tanan 726 ka mga child development centers sa lalawigan makadawat niini ang mga day care workers nga aktibo, ug kadtong naghatag og taas nga serbisyo sa pipila ka katuigan ug lakip niini ang mga retirees.
Ang aktibong DCWs adunay madawat nga P500; ang DCWs nga miserbisyo og 15 ngadto 20 ka tuig adunay madawat nga tag P1,500; ang DCWs nga miserbisyo og 21 ngadto 21 ka tuig makadawat og P2,000 samtang ang DCWs nga nakaserbisyo og 26 ka tuig pataas ang modawat og tag P2,500 samtang sorpresa usab nga gihatagan ang mga retirees nga CDW's og tag P10,000 matag usa.
Sa iyang bahin, mapasalamaton si Governor Bambi sa liderato ni Ocot sa ECCD ug mga pagpaningkamot niini una na ang pagtukod niini og gambalay alang sa ECCD office ug tunghaan sa kabataan nga makita sa kapitolyo probinsyal.
"Thank you for working hard for you will be able to give as part not only allowances to active and retirees of our day care workers but you personally delivered it to all our municipalities, the 23 towns and two cities. Thank you very much for teaching our students. Wala ta kahibalo unsa ang new normal. Wala ta kahibalo kung unsay bag-ong buhaton but it would be an assurance, masaligan ta mo nga unsay bag-o nga pamaagi makakuha ang ECCD, atong i-implementar dinhi sa lalawigan sa Misamis Oriental," pasalig ni Emano sa mga day care workers sa lalawigan.