USA sa gihisgotan ni Misamis Oriental Governor Bambi Emano atol sa flag raising via zoom adlawng Martes, Hunyo 16, 2020, sa Kapitolyo probinsyal ang pagbirada og pulong batok kang Cagayan de Oro City Mayor Oscar Moreno.
Kini gumikan sa giingong pagsaway ug pagpanghilabot ni Moreno sa ilang mga gipatuman sa lalawigan sa pakigbatok sa coronavirus disease (Covid-19).
Matud ni Emano nga dihang nagbaton og 3 ka positibo sa Covid-19 ang lalawigan, desisyon ni Dr. Jerie Calingasan nga iduso ang mga nagpositibo ngadto sa Northern Mindanao Medical Center (NMMC) isip referral hospital ug iyang gipasalamatan nga gidawat kini sa maong tambalanan.
"Asymptomatic or not, they accepted our patient and we are very thankful and yet the problem is nagdawat ang NMMC pero ang nagreklamo ang doktor nga mayor sa dakbayan sa Cagayan de oro maoy nanaway ang iyang buot pasabot nga dili kuno preparado ang Libertad," matud ni Emano ug nipasabot nga ang Department of Health nasayod nga adunay kapasidad ug mga isolation units ang kalungsoran sa Misamis Oriental.
Dugang ni Emano nga iyang gidayeg si Calingasan sa mga plano niini alang sa lalawigan gumikan kay ang kaso sa Covid-19 sa lalawigan dili locally transmitted, apan gikan sa tulo ka indibidwal nga gikan pa sa lain dapit ug miuli sa lalawigan.
Gidayeg sab niini si Calingasan gumikan 24 oras kini sa pagmonitor ug pagbantay aron maprotektahan ang katawhan.
"Walay problema ang kabug-atan niya ang pulitika kay bisan unsaon niya og paningkamot, gakasinaan siya sa mayor sa dakbayan sa CdeO ug uban nila kauban diha sa tambalanan. Very sad kay this guy almost have perfect plan and you know very well know that the cases that we have are imported not locally transmitted," matud ni Emano ug miapela nga unta dili manghilabot ug magpokos sa local transmission nga gakahitabo sa siyudad nga hangtod karon panahona wala pa nahibaloan kinsa og asa natakdan.
"Ang akong punto man gud sa dili pa ta molabay og manaway sa muta sa uban, tan-awon sa nato kung dunay troso kababag sa atong mata, and dinhi sa dakbayan sa Cagayan de Oro bag-o lang sila nag-positive og lima ka kaso and yet ang atong tulo ilang hilabtan. They should focus more on local transmission that are happening here kaysa manghilabot pa didto sa atong lalawigan sa Misamis Oriental," matud ni Emano.
Kahinumduman, nikomento si Moreno niaging daily press briefing sa City Hall nga dili kinahanglan nga dalahon ang asymptomatic nga positibo sa Covid-19 sa NMMC kay mahimo lang kini nga ibutang sa isolation unit ug didto obserbahan.
Wala pay reaksyon si Moreno sa pamahayag ni Emano.
Atol sa Cagayan de Oro daily press briefing adlawng Martes, gipaabot sa NMMC nga for discharged na ang nagpositibo sa lungsod sa Libertad ug mahimo na nga dalahon sa isolation unit.