SAMTANG nagpaabot ang Police Regional Office (PRO)-Northern Mindanao sa mga bag-ong direktiba kalabot sa travel authority gikan sa national nga kamandoan, magpadayon ang pagpatuman sa travel authority niining modified general community quarantine sa Rehiyon.
Gipahibalo ni Police Lieutenant Colonel Mardy Hortillosa, ang tigpamaba sa PRO-Northern Mindanao, nga padayon ilang pagpatuman sa daan nga polisiya ug kini mao ang pagpatuman gihapon sa travel authority.
"Mga igsuon namo sa Rehiyon 10 nga nangutana sa bag-o nga guidelines labina sa travel authority, hulat lang gamay kay wala pay nadawat ang PNP 10 nga direktiba ug still ang daan nga polisiya ang padayon nga giimplementar karon," pahibalo ni Hortillosa.
Kinahanglan gihapon og travel authority ang mobiyahe paingon ug pagawas sa Misamis Oriental labina kon moadto ug mogikan sa Cagayan de Oro tungod kay kini nga siyudad gikonsiderang highly urbanized city, adunay kaugalingon administrasyon ug adunay city director.
Wala pa usab nakadawat ang PRO og memorandum nga nagkauyon ang siyudad ug Misamis Oriental nga dili na kinahanglanon ang travel authority.
Lakip sa mga gabayan mao kining kung mobiyahe paingon ug gikan sa Cagayan de Oro ug Misamis Oriental kinahanglan magpakita og travel authority gikan sa Chief of Police sa istasyon kon asa kober ang barangay.
Ang requirement aron makakuha og travel authority mao ang medical certificate gikan sa Barangay og Municipal Health Office usa dalhon sa police station.
Kung mobiyahe gawas sa Misamis Oriental, kinahanglan mokuha og travel authority sa police provincial director sama sa mobiyahe pananglitan paingon sa Davao o lain dapit.
Dili kinahanglan ang travel authority kung moadto lang sa pikas lungsod sa Misamis Oriental pananglitan kung taga Tagoloan ug moadto lang sa lungsod sa Jasaan o Villanueva ang dili na kinahanglan magdala og travel authority.
Dili sab kinahanglanon ang travel authority kung usa ka sa sakop sa authorized person outside residence (Apor) o trabahante sa kompanya nga gitogotan nga mag-operate ubos sa modified general community quarantine ug mahimo ra nga identification card ang ipakita.