NAGPABILIN nga anaa ubos sa modified general community quarantine (MGCQ) ang Northern Mindanao nga gilangkoban sa probinsya sa Bukidnon, Camiguin, Misamis Occidental, Lanao del Norte, Misamis Oriental lakip dakbayan sa Cagayan de Oro.
Atol sa National Inter-Ageny Task Force (IATF) meeting niadtong gabii sa Hunyo 15, 2020 kauban ni Presidente Rodrigo Duterte, gipahibalo nila ang mga lugar nga kinahanglan pahugtan ug pahugakan.
Ang Cebu City maoy gikonsidera nga high risk ug gimandoan nga ipaubos sa enhanced community quarantine (ECQ), samtang ang Davao City lakip Zamboanga City sa pulo sa Mindanao maoy ipaubos sa modified ECQ.
Sa bag-ong gipagawas nga resolution sa IATF gimando nga sugod sa Hunyo 16, 2020 paingon sa Hunyo 30, 2020, ang mga rehiyon nga wala nanganlan ang padayon nga ipa-ubos na sa MGCQ o mga low-risk area.
Pabilin nga gitugotan ang dine-in sa mga kan-anan apan anaa lang sa 50 percent capacity; tourist destinations, travel agencies, tour operators, reservation services ug uban pa nga dunay kalambigitan niini nga industriya lakip ang personal care services sama sa massage parlor, sauna, facial care, foot spa ug waxing salon.
Ang mga gym/fitness studio, entertainment industries (cinema, theaters, karaoke), library, archives, ug museum kinahanglan sab ang 50 percent capacity; mga hotel sa 50 percent capacity; mass gathering (movie screening, concert, sporting events ug non-essential work gatherings) sa 50 percent capacity; religious gathering; outdoor or non-contact sports lakip na ang indoor non-contact sports basta ipatuman ang mga health standards; mga clubhouse sa 50 percent capacity; road, rail, maritime ug aviation sectors base na usab sa gabayan nga gi-isyu sa Department of Transportation ug uban pa.
Si Cagayan de Oro Mayor Oscar Moreno mapasalamaton nga gikonsidera ang Cagayan de Oro nga ubos gihapon sa MGCQ ug mapasalamaton nga magpabilin gihapon ang tanan nga mga health protocols.
Gipasabot niini nga magpadayon ang pagpuyo sa tagsa-tagsa ka panimalay kung walay importante nga lakaw, kinahanglan sab ang pagsul-ob og face mask kon mogawas sa panimalay, makanunayon nga paghugas sa kamot.
Dugang niini nga ipatuman gihapon ang paggamit og barangay exit pass kung adunay lakwon nga mga essentials ug anaa gihapon ang curfew matag gabii.
Ang mga 60 anyos pataas ug 21 anyos paubos gidid-an gihapon mogawas sa puloy-anan lakip kadtong adunay mga gihambin nga mga balatian ug ingon man mga nagsabak.
Ang siyudad adunay 21 ka kumpirmadong kaso sa Covid-19.
Sa laing bahin, gipaabot sab ni Misamis Oriental Governor Bambi Emano nga padayon nga maningkamot ang Provincial Task Force for Covid-19 nga protektahan ang probinsya labina nga anaa nay positibo sa coronavirus nga tulo ka mga locally stranded individual.
Gipaabot niini padayon ang mga gabayan o mga health protocols nga ipatuman ning pabiling ubos sa MGCQ ang lalawigan ug daw ilang paningkamotan nga dili na madugangan ang maong kaso sa Covid-19 sa lalawigan.