DAGHAN ang nagyawyaw sa tinguha sa Department of Finance (DOF) nga iparehistro ang kapin kun kulang 900,000 ka mga online sellers sa Bureau of Internal Revenue (BIR) ug mobayad og buhis aron dunay makalap nga pundo alang panginahanglan sa pagbatok sa Covid-19 pandemic.
Akong nasabtan ang ilang sentimento kay dugang kahasol ug galastuhan kini sa mga online sellers.
Katarungan nila nga di angay mangolekta og buhis ang gobyerno tungod kay diyutay lamang ang ilang kita.
Apan kung atong panid-an ang gatusan ka mga online sellers sa Facebook, dinagko man ang kantidad sa ilang gipangbaligya nga produkto. Busa, dayag nga dinagko sab ang ilang kita sa maong negusyo kung ikumpara namo nga mga yanong empleyado nga kada buwan kolektahan og buhis.
Nganong magpakabana man gyud ko niining buhis? Kini tungod kay ang buhis maoy dugo sa gobyerno. Kung walay buhis, di makalihok ang gobyerno sa pag-atiman sa iyang mga obligasyon sa katawhan.
Yawyaw sa mga online sellers, angay koletahan sa gobyerno ang Philippine Offshore Gaming Operations (Pogo) ug di sila nga nanginabuhi lamang.
Alang nako, angayan nga kolektahan ang tanang matang sa negusyo sa Pilipinas. Kolektahan man gani og buhis ang mga naninda og lamas sa merkado publiko? Sila pa ba kaha?
Tingali, ang nakabasa niining akong lindog moingon nga kontra kabus ako. Pero, angay ninyong masabtan nga "bias" ako sa kaangayan sa kinabag-ang duot sa katilingban nga posibleng mabiktima sa mga mangingilad nga online sellers.
Nganong nakaingon ako nga dunay mangingilad nga online sellers? Kini tungod sa mga reklamo nga akong nadawat gikan sa mga parente ug mga suking tigpaminaw sa radyo.
Niadtong Dominggo, Hunyo 14, nakadawat ako og reklamo sa among miyembro sa pamilya batok sa usa ka online seller nga iyang giorderan og "shaver" nga nagkantidad og P1,450. Ang iyang gikalagotan kay ang niabot, di mao sa iyang gi-order nga produkto.
Sa akong pagsusi, ang kantidad sa produkto sa lain nga online shopping company tag P235.00 lamang. Tungod niini, akong gipangutana pinaagi sa messenger ang online seller kung unsa ang rason nga di mao ang produkto nga ilang gi-deliver. Inay nga tubagon ako, ang gihimo sa online seller, iya hinuon akong gi-block mao nga di na ako makapangutana kanila.
Kung rehistrado sa BIR ang tanang magnegusyo sa online, di ba mas maprotektahan nato ang kinabag-ang duot sa konsumante? Ug makabenepisyo kita sa buhis pinaagi sa mga programa ug proyekto sa gobyerno?