MGA pampublikong bus sa dakbayan sa Mandaue di na makalabang sa Dakbayan sa Sugbo human gibalik og paubos sa enhanced community quarantine (ECQ)
Sa pakighinabi sa Superbalita Cebu ni Mandaue City Mayor Jonas Cortes, siya niingon nga kutob na lang sa border control points ang pampublikong mga bus, di na makalabang sa dakbayan sa Sugbo.
Kini tungod gibalik sa ECQ ang dakbayan sa Sugbo ug base sa guidelines, dili tugotan ang pagbiyahe sa pampublikong transportasyon.
Sigon ni Cortes nga gikan sa 40 ka mga bus nga ilang gipadagan sulod sa Mandaue ug kasikbit nga mga dakbayan, niabot na kini og 116 ka mga bus, apan sa pagbalik sa dakbayan sa Sugbo sa ECQ mamahimo nang mausab depende sa gidaghanon sa pasahero.
Sa unang adlaw sa pagpatuman sa ECQ sa dakbayan sa Sugbo, nakamugna kini og trapik sa dakbayan sa Mandaue tungod sa mas gihugtan nga border control points.
Gipasabot ni Cortes nga bisan kon ubos sa general community quarantine (GCQ) ang dakbayan sa Mandaue, gimandoan niya ang mga nagbantay sa border control point nga pahugtan sab ang control points labi na kon gikan sa Dakbayan sa Sugbo.
Dugang ni Cortes nga ang mga gikan sa ECQ nga mga lugar, tugotan lang nga makasulod sa dakbayan sa Mandaue kon gitugotan sa sumbanan sa ECQ nga makagawas.
Tungod sa mas estrikto nga border control points, sigon ni Cortes nga makalangan kini sa mga trabahante nga paingon sa trabaho. Tungod niini, giawhag ni Cortes ang mga negosyante sa dakbayan sa Mandaue nga mosabot sa sitwasyon sa ilang mga empleyado.
Siya nisugyot nga hatagan na lang og housing ang mga empleyado o temporaryo silang mo-hire og mga empleyado nga nagpuyo lang sa dakbayan sa Mandaue.
Bisan kon nagkasaka na ang mga kaso sa dakbayan sa Mandaue, niawhag si Cortes sa Department of Health nga pahingusgan sab ang pagbakuna labi na nga ting-uwan na ug anaa ang dengue ug flu. Gani, giawhag sab ni Cortes ang publiko nga motuman gihapon sa minimum health standard sama sa paghugas sa mga kamot, pagsul-ob og face mask, pagsunod sa social distancing protocol, labi na ang proper hygiene.