Veco nakadaginot og 26 megawatt nga enerhiya

NAKADAGINOT og 26 megawatt sa elektrisidad ang Visayan Electric Company (Veco) human namawong og suga ang pipila ka bahin sa Metro Cebu isip pagduyog sa

Earth Hour kagabii.

Mas taas kini itandi sa 23 mw nga nadaginot sa niaging tuig nga pag-obserbar sa Earth Hour.

Si Ethel Natera, tigpamaba sa Veco, nipahibawo nga nianang mga alas 8:30 sa gabii nikunhod og 249 mw ang power demand gikan sa 259 sa samang oras sa niaging semana.

Nasayran nga sa maong oras gisugdan ang Earth Hour ug kini nilungtad hangtod alas 9:30 sa gabii.

Paglabay sa 10 minutos gikan sa pagsugod sa Earth Hour, matod ni Natera nga niabot nalang sa 240mw ang demand sa kuryente nga may ubos kaayo itandi sa 256.8 nga demand sa miaging semana.

Nianang alas 9 sa gabii, nisamot pa gyud ang pagkunhod sa demand kay niabot na kini sa 237.25 mw nga mas minos og kapin 10mw sa demand sa niaging semana.

Mga alas 9:15 niadtong Biyernes sa gabii ang labing ubos og power demand kay niabot na sa 232.9mw itandi sa 249.6 mw sa niaging semana.

Si Cebu City Konsehal Nestor Archival, usa sa mga organizer sa Earth Hour niingon nga dakong kalampusan ang gihimong Earth Hour niadtong Biyernes sa gabii kay bisan sa gamay’ng paagi naminosan ang epekto sa climate change kay pinaagi sa pagpawong sa mga suga naminosan man usab ang pagbuga sa greenhouse gas nga maoy nakagusbat sa ozone layer diin ang epekto mao ang global warming.

Gipahibawo ni Archival nga 100 porsiyento sa Persimmon nga usa sa nisalmot sa Earth Hour ang nagpawong gyud og suga samtang 80 porsiyento sa Ayala Center ug 20 porsiyento sa Mepz.

Ubay-ubay sab sa mga simbahan sa Sugbo ang nipabagting sa ilang mga kampana mga alas 8:30 sa gabii isip pagtimaan sa pagsugod sa Earth Hour. (CPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph