UNSAY katuyoan sa mga babaye nga magsuot og mubo nga sinina nga mura man og wala nagsuot og bisti? Angayan ba silang respituhon kon sa ilang sinuotan dili man ligdong?
Nahimong init nga isyu ang pagpagawas og tambag sa Lukban Police Station sa kababaihan nga unta dili magsuot og bisti nga labihang mugboa o kanang pinapuok aron dili sila bastuson sa mga lalaki.
Ilang giani ang mga pagbatikos kay gibasol naman kuno hinuon ang mga biktima sa pagpang-abuso imbis tudloan ang mga lalaki nga magrespito sa mga babaye ug dili manglugos.
Apil sa mibatikos si Senador Risa Hontiveros ug pipila ka mga inila nga tawo ug karon nahulog nga sad-an ang mga pulis. Ila sab dayon gi-delete sa social media ang ilang gi-post nga tambag samtang gipaimbestigahan na ni Philippine National Police Chief Director General Archie Gamboa aron ilhon kinsa ang mga pulis nga nalambigit.
Tinuod man, angayan tudloan ang katawhan labi na ang kalalakihan sa pagrespito sa kababayehan kay lahi man tinuod silag gender apan pareha lang gihapon nato sila nga tawo, dunay mga katungod sa ilang kinabuhi.
Ang pagsuot og mugbo nga mga bisti dili maoy naandan sa mga dalagang Pinay kanhi, tungod halos tibuok lawas tabunan ug dili man gani makita ang kiting sa mga tiil.
Kabahin sa kultura sa mga Pilipino nga babaye ang dili pagpadayag sa mga bahin sa lawas, apan gipapas sa western culture nga maoy gisundog ug giidolo sa mga ulahing tubo; gisundog gikan sa ilang mga nakit-an sa telebisyon.
Imbis milambo ang atong nasud, midaghan ang paktorya sa mga senina, halos maghukas naman hinuon ang katawhan, mugbo na ang ginasuot ug gamay nalang ang kulang, daw naghukas na.
Mga inahan sa unang panahon tabunan pa og lampin ang dughan kung magpasuso sa anak apan karon bisan sa kadalagahan halos na molugwa ang tibuok dughan.
Makapangutana ta kon unsa bay tumong sa pagsuot sa mao nga mga bisti? Dapat kuno respituhon sa kalalakihan kon unsa ang ilang gusto nga binistihan.
Atong masabot nga sa mao nga sitwasyon murag nawala na ang bili sa mga ginikanan kay dili na makabadlong tungod kay ang mga bata duna sab silay katungod nga giprotektahan sa balaud.
Nawala na sab ang pagkabililhon sa Bibliya sa kadaghanang panimalay kay duna may talambagon si apostol Pablo sa 1 Timothy 2:9 nga ang mga babaye magbisti nga mahiangay ug maligdong.
Unsa ang katuyoan? Tungod ang tawo nga ligdong ang binistihan ginahatagan sa respito bisan dili pa niya kini pangayuon.
Sayud ko, dili kini magustuhan sa uban, apan ang atong pagginawi nagapaila kon angayan ba kita nga respituhon o mahimo ra kita nga talamayon sa uban.
Kita ang una nga morespito sa atong kaugalingon kon naghandom ta nga respituhon sa uban.