NABALAKA ang pipila ka mga Dabawenyo gumikan sa ilang tan-aw, anugon kaayo ang mga selopin nga tabil sa mga public utility vehicles sama sa dyip nga nagbiyahian sa downtown, Dakbayan sa Davao.
Sumala sa usa concerned citizen nga iyang nasultihan ang drayber una pa siya mibayad sa iyang pagkanaug labot sa mga tabil nga selopin niini.
“Hugaw na kaayo, ang mga pasahero bisan kinsa nigunit ato, then paghangin mokayab sa imong nawong. Unta ilisdan nila kada duha ba ka semana, or mangita og pamaagi ang gobyerno diri sa Davao unsay maayo ana,” ang pagpagawas sa mulo sa usa ka pasahero nga si Merlinda Saurez, taga Barangay 31-D, ning siyudad.
Kini sab ang mulo sa pipila ka mga pasahero gumikan anugon kaayo ang maong sitwasyon.
“Bisan nalang gud unta sa lingkuranan lang ang naay harang kanang in between nga mosukod og standard sa distancing. Sa tan-aw nako sayop ni nga plano, wala ta kabalo nakagunit og laway ang pasahero then migunit sa selopin,” sigon ni Freddie (nagpatago sa bansagon) taga Barangay 4-A ning dakbayan.
Kahinumdoman, wala gitugtan sa otoridad partikularmente sa Land Transportation Franchising and Regulatory Board (LTFRB)-Davao nga makabiyahe pagbalik ang mga public utility jeepneys (PUJs) kon wala kini mga tabil aron mapabilin ang tag one-meter physical distancing sa pasahero.
Aron mahatagan og travel permit, aron makapasada og balik labi na sa pagsugod sa general community quarantine niadtong Hunyo 1, mituman ang mga jeepney operators, namutang og mga selopin diin ning kasamtangan ang kadaghanan niini hugaw na kaayo tan-awon nga maoy makapaanugon basin unya maoy hinungdan sa Covid-19.
Hinuon ang LTRFB-Davao ug Davao City Health Office wala pa nagpaguwa og pamahayag labot niini nga isyu diin ning kasamtangan nagkatag na sa social media ang maong senaryo.