GISUGDAN na sa Department of Social Welfare and Development (DSWD)-Davao ang pagpanghatag sa ikaduhang hugna sa Social Amelioration Program (SAP) sa ilang buhatan.
Sumala ni Kristelle Cagatin, tigpamaba sa DSWD-Davao, nga 32,000 kapin ka mga benepisyaryo sa Pantawid Pamilyang Pilipino Program (4Ps) ang makadawat og P4,650 SAP subsidy sa Siyudad sa Davao agi sa cash cards.
Sayo niini gipahibawo sa Department of Interior and Local Government (DILG) nga sugod Miyerkules, Hunyo 17, 2020, ihatag na ang second tranche sa SAP cash subsidy.
Gisulti ni DILG Undersecretary ug Spokesperson Jonathan Malaya nga mga 4.2 milyon nga kabus nga pamilya kinsa wala makadawat sa unang tranche sa SAP unahon ning higayona.
Ang pundo mahimong ihatag "manually" o ipadala pinaagi sa "bank transfer."
Apil sa "manual payout" mao ang mga pamilya kinsa way access sa internet o way bank accounts ug smart phones.
Transaksiyon sa electronic o cashless nagtarge sa mga benepisyaryo kinsa makadawat og sa salapi pinaagi sa ilang bank accounts.
Ang second tranche sa SAP ihatag hangtud 18 million beneficiaries sa National Capital Region, Central Luzon (gawas sa Aurora), Calabarzon, Benguet, Pangasinan, Iloilo Province, Cebu Province, Bacolod, Davao City, Albay Province, ug Zamboanga City, mga lugar nga nagpabilin nga ubos sa enhanced community quarantine (ECQ) sa bulan sa Mayo. (Uban sa taho sa SuperRadyo Davao)