SUPERBALITA CEBU

Papa John: Mingaw ang Father’s Day

Sa wala pa niabot ang Covid-19, dunay banda si John Tugot Well ug paluyo-luyo ang iyang mga booking isip talent manager.

Apan karon sama sa uban, nagdiskarte na lang siya sa pagpamaligya bisan unsa sa online aron dunay ikasuporta sa iyang pamilya.

Si John usa ka single father sa duha niya ka mga anak nga silang Sophia Maurice, 16, ug Atacia Cole, 6, nga parehong tinun-an sa mga pribadong eskuwelahan.

Kon nganong naa sa iyang poder ang mga bata, ang iyang tubag nga personal niya ning kabubot-on.

Apan giklaro ni John nga nagpasalamat siya sa ilang mga inahan kay wala gyud nila pasagdi ang ilang mga anak labi na sa ilang pag-eskuwela.

“Unya karon, ang akong eldest tua sa akong sister nag-stay kay mas close man sila. Pero constant gihapon among communication,” butyag pa niya.

“Moangkon ko nga dili ko perfect nga pagka-amahan ug duna koy mga pagkuwang sa dihang nakarelasyon pa nako ang ilang mga mama. Pero karon nga nagka-edad nako mas karon ko nakasabot sa responsibilidad isip haligi sa panimalay.”

“Karong Father’s Day (Hunyo 21, Dominggo) ganahan unta ko nga magkatapok mi sa akong mga anak dire sa balay magkaonkaon. Pero maorag lisud tungod sa sitwasyon karon labi pa nga gibalik na sad sa ECQ ang Cebu City. Gimingaw na ko sa normal nga kinabuhi.”

“Sa tinuod lang naapil na unta ko sa lista anang SAP (social amelioration program) kay dugay nako walay trabaho. Pero giprotestaan ko kay naa daw koy awto. Unsa may labot sa awto? Wala na gani na gamita kay walay ikapalit og gas,” tagawtaw pa niya.

Sa nahitabo karon klarong apektado kaayo silang mga musikero kay sukad pa niadtong Marso wala na silay tukar nga mao ray bugtong nilang gisaligan.

“Naa sad koy negosyo gamay sa sounds pero wala puy mo-rent kay bawal ang event. Ibaligya na lang ni namo among mga gamit sa barato nga presyo,” minghoy ning namung.

“Mao nga namaligya kog mga glove, mask, bugas ug uban pa. Kaluoy tawon sa Ginoo mao nay akong gisaligan karon kay daghan tawon kog baba nga gipakaon.”

“Apan lahi ra gyud ang pangita nako sa una ug karon. Kon moabot sa punto nga wala na jud mamalit mangayo kog tabang sa akong igsuon. Ampo lang ta nga mabalik na sa normal ang tanan. Pero utong pa more kay maorag dugay pa jud ni.”

Usa sa mga mabulukong yugto sa career ni John dihang nag-viral sa YouTube ang gi-upload niyang video sa iyang talent nga si Roland “Bunot” Abante nga nikanta og “To Love Somebody” ni Michael Bolton.

Si John nahimong drummer niadto sa SRO, Empire Groove, Frolic ug nakatukar usab siya sa Manila kauban ang Chazer Band.

John Tugot Well, Ssssuper Ka!

Asa na imong talent nga si Bunot?

Naa ra man siguro siya sa Oslob. Kon naay booking puwede ra man gihapon nako siya makuha kay last December ako man siyang gikuha. Pero dugay nang na-end iyang contract nako.

Wala kay plan mag-fundraising concert?

Nindot unta kaso bawal man gud ang mga event karon. Daghan mig plans pero lisud pa kaayo matinuod tungod sa panahon karon.

Okay ra man kaha imong negosyo?

Maka-ginansiya ginagmay usahay sad wala.

At least supportive gihapon imong mga ex sa mga bata?

Usahay kuhaon sila sa ilang mga mommy labi na kon walay duty. Usahay groceryhan sila. Sige man silag bonding. Okay ra man hinuon puyra buyag.

Asa mo sagad mag-bonding?

Sa mall or beach. Karon purga.

Wala moy plan sa imong girlfriend karon magka-baby?

Wala uy pass sa ko ana. Hehehe...


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph