Tanang nilangkob sa frontliners sa Dakbayan sa Lapu-Lapu nga nakigbatok sa coronavirus disease (Covid-19) gitagsa-tagsa sa paghingalan ni Mayor Junard Chan sa iyang pagpasidungog atol sa programa sa kasumaran sa ika-59 nga Charter Day sa dakbayan, kagahapon, Hunyo 17.
Usa ka yano nga kalihokan ang gipahigayon sa city hall grounds nga gipangulohan ni Acting Mayor Celedonio Sitoy, sakop sa konseho, pipila ka department heads ug employees.
Si Chan nipadangat sa iyang mensahe pinaagi sa video. Ang mayor nipaubos sa quarantine sa ilang balay human nagpositibo sa Covid-19.
“Akong gihatag ang akong pagsaludo sa nagkalain-laing mga ahensya sa atong pang-gobyerno,” saysay ni Chan.
Nag-una sa listahan ang City Disaster Risk Reduction and Management Office nga gipangulohan ni Nagiel Bañacia, City Health personnel, doktor sa publiko ug pribadong tambalanan, uniformed personnel, Philippine Red Cross ug Emergency Rescue Unit Foundation ( Eruf), Barangay Mayor’s Office, pribadong organisasyon ug volunteer groups, traffic personnel, barangay opisyal, City Social Welfare and Development Office ug uban pa.
Gilakip na ang mga pribadong kompaniya nga miabag sa Siyudad sa pagtunol og mga donasyon.
Gipasalamatan sab ang Covid-19 survivors nga milampos sa pakigbatok sa maong sakit.
Niyukbo sab si Chan sa unom ka mga nangaging mayor human nga nahimong dakbayan ang Lapu-Lapu sukad niadtong 1961.
Sila nahimong instrumento nga milambo ang siyudad sa natad sa ekonomiya ug turismo.
Gihinganlan sa opisyal sila si Mayor Mariano Dimataga, Maximo Patalinjug, Sylvestre Dignos, Ernest Weigel, Arturo Radaza ug Paz Radaza.
WAY BONUS
Giklaro ni Chan alang ngadto sa tanang kawani sa city hall nga karong tuiga wa una silay madawat nga Charter Day bonus nga maoy naandan.
Nangayo og pagpasabot nga mayor nga ang pundo alang sa maong katuyoan kasamtangan nga igahin lang una sa ilang kampanya sa pakigbatok sa Covid-19.
Sumala pa nga ang siyudad nag-atubang og dakong hagit niining krisis nga nasinati karon.
“The greater challenge now is rebuilding the city’s economy that is badly hit by the Covid-19 pandemic. I am confident that with the help of the city council inubanan sa inyong hugot nga suporta ug kooperasyon, magmalampuson ug magmadaugon kita,” asoy ni Chan. /