GIANDAM na karon sa Department of Interior and Local Government (DILG) ang mga papeles sa ipasaka unyang kaso batok sa mga indibiduwal nga nagdoble ang pagdawat sa ayuda gikan sa gobyerno ubos sa Social Ameloriation Program (SAP).
Matag rehiyon gipangdukdok na sa DILG national ang ilang mga buhatan aron mahan-ay ang mga pangalan sa mga tawo nga nanikas sa pagdawat sa ayuda.
Kon hunahunaon mas daghan pa ang angay nga ayudahan, lamang kay sila duna pama’y makuot, ug ang uban sa estado sa pamuyo, morag arang-arang, maong wa sila maapil, apan miabot baya ang takna nga nagpait na tungod sa lockdown, maong angay unta sila nga maayudahan sab.
Apan naay pipila nga bisan nakadawat na, gidawat gihapon ang ikaduhang pangalan nga lagmit nasayop sa pagpinal sa Department of Social Welfare and Development (DSWD).
Karon wala giuli ang ikaduhang nadawat, gipahimuslan ang panahon, abi seguro og di sila mahibal-an nga sa karon computerized na baya, dako ang kompiyansa nga di mahibal-an, karon kay tinud-on man gyod kini sa gobyerno.
Sa taho nga migawas kagahapon, naa nay mga pangalan ang DILG nga pangkasohan, nakulbaan na karon ang mga tikasan.
Kuon mahitabo na nga kasohan na sila, lagmit kini ang mahimong leksyon sa kadaghanan di lamang sa sitwasyon sa SAP, apan kapanaminan kini nga di angay nga buhaton ngadto sa ubang butang ug pamaagi.
Karon kay mahitabo na ang pagpang-apod-apod sa ikaduhang hugna sa ayuda ubos sa SAP, maamgo na unta kining mga tawo nga tikasan.
Basin naa sa Davao Region? Na hala pangandam nalang daan sa posibleng kaso nga moabot puhon.