KADAGHAN sa gikalingawan karon sa netizens diha sa social media (socmed) nga nakapahupay sa nagduka nga takna ug nakatabang sa pipila.
Diha’y magkatawa ka, kay bisan di kaayo hitsuraan, moguwapa gyod sa “FaceApps” ang guwapo, mosamot ka guwapa, ug ang wa’y buhok sama nako, mabutangan og buhok. Hahaha.
Hugyaw kaayo ang socmed labi na kung naay manggawas nga mga bag-ong apps, pero molabay ang pipila ka semana, mawala ra sab ni, unya mapulihan na sab og bag-o.
Sikat sab karon sa socmed kining Barter Community, dako baya og tabang alang sa tanan, bisan ako, nakasinati ko; nakatabang ko sa akong gi-barter-ran.
Usahay, sa sige nako’g scroll sa group page ning Davao Barter Community, bana, asawa ug uyab nalang ang kulang nga ipa-barter, hahaha naa tanan didto bisan arenola naa, guys. Hahaha.
Trending sab karon ang hisgutanan sa pagpasaka og kaso sa mga tikasan nga midawat og doble sa ayuda ubos sa Social Amelioration Program (SAP). Kasohan na sila sa Department of Interior and Local Government (DILG), walay kabutangan sa ilang kakulba karon.
Mas labing trending mga higala ang madakpan, unya ma-socmed; nadakpan kay naglakaw-lakaw nga walay Food and Medicine (FM) pass, nasikop sa curfew ug ang gahi’g ulo, nga modimdim gayod og alak kay naay sekreto nga mapalitan ug ang daw pagka-arogante nga manubag sa otoridad.
Sa kadaghan og trending karon sa socmed nga maoy nakapalingaw kanato samtang kita nag-quarantine, unta, kini nga mga butang makatabang nato paunsa kita mamahimong malig-on luyo niining atong giatubang nga suliran.
Sa Davao City, nia gihapon kita sa general community quarantine (GCQ) diin atong paningkamotan nga di kita masusama sa Cebu City didto sa Sugbo nga gibalik sila sa Enhanced-CQ, kay lagi misamot kadaghan ang kaso sa Covid-19.
Mag-ampo lang ta kanunay, mag-amping ug kinahanglan motuman sa mga mandu sa otoridad aron di kita mataptan niini nga virus kay lisod na, ang kinabuhi kausa ra, busa ampingan nato kini.