NAKAHATAG og kaluag sa pagbati ang pagdaug ug paglabnot og world title ni Filipino Fide master (FM) Sander Severino sa natigayon nga International Physically Disabled Chess Association (Ipca) World Online Chess Championship 2020 niadtong Miyerkules, Hunyo 17, taliwala sa mga hagit sa coronavirus disease 2019 (Covid-19) pandemic.
Ang 35-anyos nga lumad nga taga Silay City wa gyud makatilaw og pildi sulod sa siyam ka hugna, kinsa nikamada og 8.5 puntos sa torneyo nga giapilan sa mga maayong mga para chess players sa kalibutan.
Pulos sab nitala ang international master (IM) sa Israel ug IM Andrei Obodchuk sa Russia og siete puntos apan ang naulahi nipukan kang Obodchuk pinaagi sa superior tiebreaks, 41.25-31.75, aron nga mahiluna sa ikaduha. Ang taga Rusya nakaluna lang sa ikatulo.
Si Severino sa Facebook Messenger chat interview kagahapon, nagsulti, “(It’s a) dream come true. Sobrang saya ko po.”
Dugang pa niya, “Everytime naglalaro po ako binibigay ko ang best ko kaya I expect to perform well. Nasa top 3 lagi ang goal ko.”
Kahinumdoman nga nakatabla sab si Severino sa kampeyonato sa unang Online Fide Cup for Players with Disabilities niadtong Mayo, nitabla sa iyang ikaduhang round nga tigi ug nipukan pa sa lain pang walo ka mga kontra sa torneyo nga gihimo pinaagi sa lichess.org.
Apan iyang giangkon nga nakulbaan sab siya bisan kon nagduwa lang siya sa online.
"Medyo kabado po, kahit lagi ako naglalaro online pero iba pa rin pag official event at nirrepresent ang country. Pero salamat sa suporta ng friends and chess community, sa guidance din ni Coach James maganda ang resulta. Ang kaba andyan talaga lagi, pero ang additional na kaba ko sa internet connection at brownout."
Mao nga human sa ni-resign ang iyang Round 9 rival IM Ihor Yarmonov sa Ukraine, ang 2019 Ipca World Champion, nihugyaw lang si Severino og 30 segundos unya nikalit og brownout.
"Kung natagalan po konti talo ako sa last game dahil sa brownout," dugang pa niya.
Iya sab nga gibuntog si Harry Sauti sa Zambia, Vladimir Kuprin sa Russia, IM Andrei Gurbanov sa Israel, Ilia Lipilin sa Russia, Mikhail Khudov sa Russia, Domagoj Glažar - Croatia ug Filipino national master (NM) Jasper Rom.
Nitabla si Severino kang Vladimir Shumsky sa Russia sa ilang ikaduhang round nga tigi.
Samtang gikanayon sab ni Philippines para chess team coach James Infiesto sa Davao City sa Facebook Messenger chat interview kagahapon, “this victory in difficult times showed that even during quarantine, we can follow government guidelines and provide international honor.”
Ang kadaugan, sumala kaniya, dako kaayo ngadto sa Philippine Para Chess Team kay ang Ipca World Chess Championships nga sayo niini gitakda didto sa Israel nakaanselar tungod sa pandemya, hinungdan nga mga tigpasiugda nilusad og online version sa torneyo; ug ang Asean Para Games, kon diin ang nasud unta ang modumala, gipospon usab.
Gibutyag sa National Chess Federation of the Philippines regional director nga ang Pilipinas dunay maayong tsansa sa pagdaug sa prestiyusong chessfest tungod kay di lang siya ang Pinoy nga nagduwa.
Sila si NM Jasper Rom ug Panabo City's arena grand master Henry Roger Lopez, kinsa kabahin sa napormang historic five gold medal harvest sa Pilipinas niadtong 2018 Asian Para Games sa Jakarta, Indonesia, nahiluna sab sa ikaunom ug ikawalo sa maong han-ay sa Ipca event.