Usa sa mga mensahe nga akong nadawat nga gishare sa usa ka higala ang nakapahinuktok nako kadiyot nga gikan kuno kini kang Dr. B. Calinawagan.
Maningkamot ko paghubad sa mensahe ngadto sa Binisaya: “Kami nga mga health workers di na ang inyong frontliners. Kami na ang inyong Last Line of Defense. Kamo, mga kaigsoonan, mao na ang frontliners karon.
Ang pakig-away nibalhin na sa community ug kamo na ang bahala. Di kini mahimong daugon sulod sa ospital...”
Nipadayon ang mensahe: “Hinuktoki kini: Responsable ka sa pagpanalipod sa imong kaugalingon, sa imong pamilya, sa komunidad ug sa nasud.
“Ang paglibkas sa pila ka mga gidili wa magkahulugan nga magdanghag ug di na magbinantayon ug nga nahibalik na sa
normal ang atong kinabuhi.
“Gidili pa gihapon ang pagtapoktapok. Gikinahanglan ang pagka responsable.”
Uyon ko sa mensahe. Unsay imong hunahuna?
Wala ko makasubay sa Pinoy Big Brother Balikbahay Edition kaniadto mao nga sa replay niini sa Kapamilya Channel, nakalitan ko sa dihang gibutyag ni Hashtag Nikko nga wa diay maminyo ang iyang mama ug papa ug nga wa siya magdako nga kauban ang iyang papa.
Sa akong hunahuna nakaingon ko: “Hala! Wa diay ko mag-inusara.’ Anà.
Sa among chat group sa mga classmates nako sa high school, may nag-share sa video nga gikanta ang Leron Leron Sinta sa usa ka choir sa usa ka unibersidad sa Estados Unidos.
Nahinumdom ko sa video nga gikanta sa pila ka grupong langyaw ang kantang Rosas Pandan. Akog gi-Google ug gi-share ang video sa NNSU Academic Choir atol sa World Choir Games 2008, sa Canadian Choir ug sa American Choir.
Nagpasalamat ang duha ka babayeng classmate kanhi. Sa pagpaminaw nako, nibalik sa akong hunahuna ang bahin sa paglitok sa YouTube nga ‘yutub’ nga alang nako ‘yutsub’ ang sakto.
Sa mga video gilitok sa mga choir ang pulong ‘tikadong’ isip ‘tsikhadong’ ug ang ‘nagtan-aw’ isip ‘nagtsan-aw.’ Mao nga pag-yutub yutub lang mo diha kay yutsub gyud ang ako. Anà.
Tungod sa shutdown sa ABSCBN wa na mapadayon ang replay sa May Bukas Pa diin gitawag ni Santino (gidala ni Zaijian Jaranilla nga bata pa kaniadto) ang Ginoong Hesus nga ‘Bro.’
Usa nako ka amigo niingon nga kini ang husto nga pagtawag kang Hesukristo imbes ‘Papa Jesus’ nga sagad itawag sa mga gagmayng bata. Kini tungod kay anak siya ni Mama Mary ug di bana nga tawgon natog Papa Jesus.
Tungod kay gitugyan man ni Hesukristo si Mama Mary nga atong inahan, atong igsoon si Hesukristo ug angay lang tawgon nga ‘Bro.’ Di ba?