Gimando niadtong Lu nes, Hunyo 15, sa InterAgency Task Force for the Management of Emerging Infectious Disease (IATF), nga ibalik ang quarantine status sa Cebu City ngadto sa enhanced community quarantine (ECQ) gikan sa general community quarantine (GCQ).
Gihulagaway kini ni Cebu City Mayor Edgardo Labella nga sama sa sayaw sa Sinulog. Matod pa niya, “just like the Sinulog dance offered to Señor Santo Niño, this is our one step backward before going two steps forward.” Kurintinas nga atrasabante. Pero, duha ka lakang ang abante, usa ra ang atras. Di sama sa tawo nga nisulti nako nga sa dihang nahubog siya, usa ka lakang ang abante, duha ang atras. Kon wa pa siya molakaw nga nagtalikod, di siya maabot sa ilang balay.
Bugat ang yugo nga gisangon sa abaga ni Mayor Labella ning paghugpa sa corona virus disease kon Covid19 dinhi sa syudad sa Sugbo. Mora siyag kapitan nga nagtimon sa usa ka barko nga gikusokuso sa dagkong mga bawod sa iyang pagbalanse sa hulga sa kinabuhi ug sa pagkawagtang sa panginabuhi sa katawhan.
Si Mayor Labella usa ka survivor sa pagkalunod sa MV
Princess of the Orient sa kadagatan sa Batangas niadtong Septyembre 18, 1998. Tingali, dunay mahinungdanong tumong ug hinungdan nga nakalingkawas siya sa maong trahedya. Karon siya nay nagtimon sa syudad sa Sugbo. Apan unsay iyang nadawat? Mga pagsaway ug pagbasol gikan niadtong angay unta nga magpakahilom hangtod nga molurang ang unos nga gitawag og Covid19.
Giapelar ni Mayor Labella sa kadagkoan sa kaulohan ang ipabilin ang GCQ sa syudad sa Sugbo. Samtang wa pa mausab ang mando sa IATF ug ubos pa kita sa ECQ, tumanon na lang ang mga istriktong health protocol ubos niini.
“Ako hangyoon kamo, mga kaigsoon nako sa Dakbayan sa Sugbo, I urge you to do your part. Stay home, wear masks, follow safety protocol. I urge every barangay official to strictly enforce, because you are at the forefront, to enforce strictly the social distancing and wearing of masks,” nagkanayon ang mayor.
Ang pagsaka sa mga kaso sa Covid19 dinhi sa syudad nagpasabot nga di kakompyansahan ang maong sakit. Ang tagsatagsa adunay obligasyon sa pagpanalipod sa iyang kaugalingon ug sa iyang mga minahal sa kinabuhi.