SUPERBALITA DAVAO

Talento: Millions and billions

HELLO mga higala! Dinagkong ihap gayud ang titulo nato karong adlawa kay dili lang usa apan milyon ug bilyon pa! Maayong adlaw diay dinha.

Belated 30th mare, Elvira ug 7th bertdey kay Client sa akong kinugo, Edaga sa Minda, Carmen, Davao del Norte. Natagbaw gayud ko sa papaitan, kaldereta ug kilawing kanding nga hastang lamia pagkatimpla.

Lakbitan nato ning hisgotanan sa kurapsyon. Ang akong higala nga si Sir Dodong Solis usa sa mga mag "strong" sa susamang isyu, diba, Dir Doodz? Musta po?

Bitaw ang pulong nga kurapsyon adunay pipila ka mga kahulogan og kategorya sama sa akto nga nagdaot o estado nga madunot, moral nga pagtuis; pagkadaotan, pagbabag sa integridad, dunot o dili matinuod nga mga pagdumala, suhol, pangikil, nepotismo, graft, embezzlement, parochialism, cronyism, pagbag-o sa giingon sa sinultihan o sa usa ka teksto, pagkadunot bisan unsang makadaot nga impluwensya o kabubut-on, ug uban pa.

Daghang deskripsyon, pamaagi o duol nga kahulugan apan WALA as in "zero" gayud nga nindot nga bunga o epekto sa maong akto. Malipay seguro ang nagbuhat kay mapuno ang iyang bulsa apan impyerno man gihapon ang padulngan niya.

Dili gayud kumpleto ang akong adlaw kon dili makisayod sa mga nag-unang balita busa gawas sa mga peryodiko, kusog nga radyo sa silingan nako, anaa pa ang telebisyon ug internet nga akong lilianan. Ingon ana gyud besh, kay lahi ra gayud nga makapangandam kita sa mga posibleng panghitabo sa palibot ilabi na nga anaa pa ang pandemya, diba?

Sa press briefing sa palasyo nga gipangulohan ni abogado Harry Roque, makaluya nga sa kadaghang utang sa Pilipinas, ug sa padayong nagkadaghang nagkalisod ilabi na sa pandemya, grabe makapangurakot ang ubang opisyal sa panggamhanan, higala.

Usa sa gitumbok ni Roque mao ang kurapsyon kuno nga nagapanghitabo sa buhatan sa Philippine Health Insurance Corporation (PhilHealth) nga mokabat sa P150 billion. Yes, bilyones atong ginahisgotan diri mga higala dili sentimo o piso-piso nga kuwarta sa publiko.

Sa inisyal nga imbestigasyon nga nadungog na pod nato kaniadto, adunay mga patay na apan padayong nakadawat sa budget (hinabang sa gobyerno) aron mag dialysis, migo.

Ang patay dugay nang gilubong apan ang mga kurakot nga mag personahe (DILI TANAN) sa maong buhatan, nagsuyop sa kwarta nga unta itabang sa mga pobre pod natong mga kaigsuonan.

Dili gayud ko hawod sa mga numero o sa Math subject, migo, pero sa tinamban nga pamaagi morag kung dili makawat ang pundo sa panggobyerno, mas monindot unta ang kahimtang sa mga Pilipino.

Tiaw mo na, ang populasyon sa Pilipinas sa kasamatangan anaa ra sa 105 milyon kapin; ang kwarta nga kuno nakurakot P150 bilyones. Kon hatagan og tag lima ka milyon ang matag-Pilipino, kapin tunga ra sa bilyon ang magasto. Datu na unta kaayo kita, no?

Kahinumdum mo atong mga proyekto nga gidumala o ning agi sa mga kamot ni Janet Lim Napoles? Hastang daghana pod ang nahilambigit ato nga mga lider pa sa atong gobyerno.

O God, katong giboto nato nga moserbisyo, sila ray nagpadatu. Ang kahakog gayud walay katagbawan. Kitang mga ordinaryong tigbayad og buhis, padayong nag-ilaid sa kalisdanan.

Syempre ang gobyerno daghang gastuhanan busa nindot unta kung adunay klarong padulngan ang buwis nga ginabayad nato sa gobyerno.

Si President Rodrigo Roa Duterte pirteng panikamot ug pangitag ayuda ilabi na nga anaa kita sa pandemya apan ang ubang katawhan daw labaw pa ang kadautan sa ilang pagpangawkaw.

Ang Bibliya nagpahinumdum, "Bisan kinsa nga hakog tungod sa dili matarong nga ganansya nagasamok sa iyang kaugalingong panimalay, apan siya nga nagadumot mga hiphip (bribe) mabuhi," Mga Proberbiyo 15:27.

Padayon natong iampo mga igsuon nga dili kita mahilambigit bisan sa ginagmayng korapsyon, ug unta ang mga nangurakot makadawat og kumbiksyon aron sama ni Zacchaeus (Bibliya), sila maghinulsol ug ibalik sa katawhan ang kwarta nga ilang iligal nga gikamkam. AMEN?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph