KIBLAWAN, Davao del Sur -- Gikonsiderang high-value target ang miyembro sa Sangguniang Bayan (SB) ning lungsod nga nadakpan nga nag-shabu kauban ang iyang drayber ug harvester sa mangga sa iyang giarkilahang puwesto sa Bankerohan Public Market sa Davao City, Sabado sa miaging semana.
Gilantaw sa Philippine Drug Enforcement Agency (PDEA)-Davao nga dakong kalampusan ang pagkasikop kang Konsehal Cipriano Sarona kay human sa pipila ka tuig nga surveillance nadakpan ra gyud kini.
Ang konsehal nalakip sa drugs watchlist ni Presidente Rodrigo Duterte ug nag-unang target sa Davao Region.
Samtang gibutyag sab ni Kiblawan Mayor Carl Jason Rama nga wala sila masayod nga anaa sa listahan ni Presidente Rodrigo Duterte ang konsehal sanglit wa kini magpakita sa ilang lugar nga adunay ilegal nga kalihukan.
Bisan ang PDEA-Davao mikompirma nga sa Davao City mihimo sa iyang ilegal nga aktibidad ang opisyal aron hinlo sa mata sa ilang katawhan.
Gumikan sa nahitabo, taktakon na sa partidong Hugpong ng Pagbabago nga gipamunoan ni Davao City Mayor Sara Duterte si Sarona.
"We will expel Councilor Sarona sa HNP kay dili man pod nato pwede i-tolerate ang nahitabo. Among gi-refer sa DILG (Department of the Interior and Local Government) mura'g ma-hold iyang suweldo but unless proven guilty si Dodong Sarona ang mahitabo is dili maapil ang iyang personality sa quorum sa munisipyo or maski unsang mga botasyon," pahayag ni Rama.
Tungod sa gibuhat sa konsehal, gitakdang ipailawom sa mayor sa random drug testing ang tanang kawani sa ilang munisipyo.