MAHATAGAN na og sulbad sa Septiyembre 2020 ang gikalisangang coronavirus disease 2019 (Covid-19), kini maoy panagna sa 85-anyos nga numerologist nga nakabase sa siyudad sa Kidapawan.
Si Professor Morey Catapang, gawas nga usa ka numerologist, usa sab ka Tarot Diviner, nga nahinabi sa SunStar Super Balita pinaagi sa selpon, nagbutyag nga Septyembre balik na sa normal ang tanan ug wa nay angay kabalak-an ug hapsay na nga makalihok ang katawhan.
Sumala pa niya nga way bakuna nga mamugna sa sakit apan kalit kining mahanaw sama sa kalit niya nga pagbutho.
Gikanayon niini nga sugod sa Agosto, inanay nga mahibalik sa normal ang dagan sa panginabuhian sa katawhan ug sa pagtungtong sa bulan sa Septiyembre hingpit nang masulbad ang pandemya.
Giklaro ni Catapang nga way kamatuoran sab ang na–post sa Facebook nga dunay moabot nga kusog nga linog, tungod kay wala siyay nalantawan nga laing katalagman gawas sa pagmaya sa katawhan kay mawagtang na ang Covid-19 pandemic sa maong bulan.
Hinuon, gibutyag ni Catapang nga gihimo lang siyang instrumento aron mapaabot ang posibleng mahitabo apan ang matuod nga dunay gahum nga mohimo sa usa lamang ka pagpamilok mao ang Diyos nga atua sa langit nga maoy matuod nga gamhanan.
Iyang giawhag ang katawhan nga padayong mangaliya ug mag-ampo sa Labaw'ng Makagagahum.