SA KA daghan sa mga nangamatay gumikan sa Covid-19 diin ang uban kanila mga kaliwat ug higala, pulos nalang pag-ampo ang atong masampit sa kahitas-an. Gihikawan kita sa kahigayonan nga personal nga maka padayag sa atong mga pag-ampo ug pahasubo ngadto sa nagbangutan nga pamilya.
Kini gumikan sa mga protocol nga gipatuman batok sa social distancing ug mass gathering. Ang labing subo nga bahin kay bisan gani mga kabanay gidid-an man nga makalili sa tambalanan hangtod na sa paghipos sa patay. Ang naandan nga seremonyas diin bilaran og tagpila ka adlaw ug gabii ang haya, nawala na sa hingpit. Pagkadako sa kausaban. Pagkatampalasan kining makamatay nga virus.
***
Karong bag-o laing higala ang nitaliwan gumikan ning maong virus. Ang akong gipasabot mao si Jonas Borces nga naila nga usa sa malamposon nga Sugboanon sa kalibutan sa pagpa gwapo ug pagpa gwapa. Sa liboan nga nasubo sa iyang kalit nga pagtaliwan, may usa ka pulis ang lakip sa nagbangutan. Siya mao si Police Executive Master Sargeant Antonio Din. Suki ni Jonas sa iyang parlor sa dugay nang panahon. Apan dili ang iyang pagkasuki maingon natong nagtakdo ang ilang pagka suod.
Ingon niini ang sugilanon sigun sa asoy ni Sgt. Din nga nadistino kaniadto sa CCPO Mobile Patrol Group. Marso 15, 2007, si Sgt. Din nga nagranggo pa kaniadto og Police Officer 2 kun PO2, nagpatupi ni Jonas. Pasado alas 9 na sa gabii apan diha pay dul-an sa 20 ka kustomer. Samtang nagpaabot sa iyang turno, iyang nakita ang kalit nga pagsud sa duha ka lalaki, dayong tion sa ilang mga armas ug nipahibalo nga tulis. Gimanduan silang tanan sa paghapa. Ang usa nagdali nga nanguha sa kuwarta, cellphone, alahas ug ubang mahalong butang gikan sa mga kustomer. Ang iyang kauban nagsilbi nga bantay sa pultahan. Si Jonas nga nakakita sa ilang pagsud daling nakatago sa comfort room. Niingon si Din, nga samtang siya naghapa ang diha sa iyang hunahuna mao ang iyang 45 kalibre nga pistola nga giluklok sa iyang hawak.
“Naghulat ra gyud ko ato og higayon pag-neutralize sa mga tulisan pagsiguro pud nga di mapagan ang mga kustomer,” asoy ni Din. Ang una niyang puntarya mao kadtong diha sa pultahan, nga nagsilbi nga lookout. Sa dihang nibunot na siya sa iyang armas, nakamatikod kini ug siya gipusil. Maayo gani kay igo ra siyang natapsingan sa bukton ug sa iyang pagbawos hagba ug iyang napatay ang kriminal.
Ang laing kauban nibawos mao nga nakahukom siya paggawas sa parlor ug nitago samtang nanawag siya og backup. Nakaipsot ang ikaduhang tulisan. Basi sa nakuha nga mga ebidensiya sa suspek nga napatay, nasayran nga duna pa silay daghang kauban nga pulos mga gikaintapang tulisan gikan sa Mindanao. Nakonpirmar kini sa follow-up operation. Giila silang responsabli sa mga dagkong tulis dinhi sa Sugbo.