DALING gipalabang sa kongreso ang Anti-Terrorism Bill nga lig-ong kalamboan sa nasudnong seguridad pagsapaw sa walay ngipon nga Human Security Act.
Nagdumili pagpatuman ang mga awtoridad kay dunay probisyon nga pabayron og P500,000 matag adlaw sa akusado nga maabswelto sanglit igo lang pasakaan paglapas sa Revised Penal Code.
Terorista ang magtisok og kahadlok, moagni, apil sa plano, konsabo, pangataki nga moresulta sa pagkaangol ug pagkamatay, paggun-ob sa kabtangan sa gobyerno ginamit ang eksplosibo.
Ubos sa Anti-Terror Act gipahugtan nga mahimong dakpon nga walay warrant of arrest hukom sa Anti-Terrorism Council. Bilanggoon sa 24 ka adlaw samtang sudlayon pa ang mga ebidensya ug siksikon ang nagpahipi nga itom nga laraw sa rebelyon. Apan gikondenar sa mga militante, aktibista, human rights ug oposisyon sa katarungan nga dili makiangayon, maabusohan ang tawhanong katungod ug gituok ang kagawasan sa pagpadayag. Singgit nga ibasura kay mipatay sa demokrasya sa nasod.
Ang pagdakop sa nga ralyista sa UP-Cebu dili kadto teroristang binuhatan kay nalatid sa konstitusyon ang katungod sa pagprotista sa malinawon nga paagi subay sa Public Assembly Act. Matod pa, “activism is not terrorism”. Hinungdan sa pagsikop mao ang mass gatherings nga kalapasan sa GCQ protocols. Wala sab respitohi ang mibadlong nga mga otoridad tingali wala makapugong sa kainit sa ilang kawsa.
Talaan sa mga terorista kabahin sa ilang linuog nga krimen mikalas sa daghang kinabuhi. CPP-NPA-NDF ni Joma Sison nga nakamugna og kinatas-ang rebelyon sa Asya, MNLF ni Nur Misuari sa gubat sa Zamboanga City.
MILF nila Hashim Salamat ug Murad Ebrahem nga nangataki sa Mindanao. BIFF ni Amerila Umbra Kato nga namomba sa Midsayap, Cotabato ug Hilongos, Leyte. JIM ni Mohammad Ali Tambako sa ngilngig nga pag-ihaw sa SAF44 Mamasapano massacre.
Abu Sayaff sa magsoong Abdurajik ug Khadaffi Janjalani sa pagpamomba sa Cathedral sa Jolo, Sulu ug maoy naingnan sa gubat sa Ilaya, Napo, Inabanga, Bohol. Maute sa magsoong Markhayam ug Abdulla Maute nga nagmangtas sa gubat sa Marawi City. Al Qaeda ni Osama bin Ladin nga mipahugno sa Twin Towers sa gamhanang nasod sa Amerika.
Jimaah Islamiya nila Abu Bakar Basier ug Abdullah Sungcar nga namomba sa lain-laing suok sa kalibotan. ISIS ni Abu Bakr al Baghdadi nga mipabusikad og eksplosibo sa Butlig, Lanao del Sur. Sa pagkakaron giimbestigar sa Anti-Cyber Crime Unit ang pagsiaw sa fake, dummy ug pag-hack sa facebook account kon konektado ba sa anti-terrorism gawas nga gamiton sa ilegal nga transaksyon. (csa_1156@yahoo.com / 09064648954)