Binghay: Leksyon sa Covid-19

DI IKATINGALA nganong nabalik ang Siyudad sa Sugbo pag implementar sa ECQ kun enhanced community quarantine hangtod sa katapusan ining buwana. Ngano? Daghan gihapon ang wa maminaw ug wa magpakabana sa mga autoridad unya nagpabadlong pa gayod og panghagit maong misaka na sab pagbalik ang gidaghanon sa mga nasakit ining coronavirus.

Imbis nangalipay na unta ang kadaghanan paghuman sa Mayo kay gilibkas na ang ang ECQ, gibalik na sab hinuon pag-limit ang mga lihok sa tanang molupyo ug paggamit balik sa passes nga gipang apud-apod kada tagbalay.

Gawas ini, wa na say padaganon nga mga pampublikong sakyanan unya balik na sab og panera ang mga tunghaan, malls og eskwelahan gawas sa mga ospital, tindahan og mga pampublikong tunghaan nga naghatag sa hiniunang serbisyo.

Gidili na sab pagbalik ang pagpundok-pundok ug pagbiyahe unya gisamot og estrikto ang pag-implimentar sa social distancing ug curfew.

Sa pagkakaron, mi-abot na subra 8 ka milyon ang kaso sa mga natakdan sa Covid-19 sa tibuok kalibutan basi sa World health Organization (WHO) og dul-an 27 mil na sab dinhi sa atong nasud.

Ang mga dagkong leksyon nga akong nakat-unan pag-igo ining Covid-19 mao: ‘Life is short’. Di nato matagna kung anus-a kita mo expire sa atong pagpuyo dinhi sa yuta, ang kamatayon di sab mopili ma dato o pobre.

Laing leksyon akong nakat-unan nga way permanenting trabaho. Anytime kita pweding mataktak sa gitrabahoan bisag unsa pa ka dugay nagserbisyo sa kompaniya.

Dayon, ‘health is wealth’ maong angay ampingan ang atong kalawasan kay gasa kini sa kahitas-an. Kaon og insakto.

Ang atong ugma way kasiguruhan nga kita magpadayong buhi kay mahimo kitang matakdan bisan asa ug kanus-a, busa buhata ang tanan para magmalipayon .

Ug ang labing importanting leksyon, kita tanan dunay kinutuban kay ang atong kinabuhi ato ra mang hinuwaman gikan sa kahitas-an busa atong hugton ang atong pagtuo sa Labaw’ng Makagagahom nga maoy nag-inusarang maka-luwas ining tanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph