NAGKADAGHAN na ang mga tawo nga nagbiseklita karon sa kadalanan. Makaguol lang kay duna nay mga aksidente nga naglambigit sa biseklita. Niadtong miaging Dominggo, nadasmagan sa may N. Bacalso ang usa ka tawo nga nag-bike. Makapahibung kay way sakyanan nga gitugtang makadagan sa kadalanan gawas lang niadtong exempted nga sektor. Unya ang nakadasmag di man exempted, usa lang ka ordinaryong tawo.
Sa Sabado sa buntag, laing biseklita na sab ang nadasmagan sa usa ka motorsiklo. Nadala gihapon sa ospital ang nagbiseklita.
Kini nga mga aksidente hayan malikayan unta kon ang Siyudad sa Sugbo milihok pa sa saad nga magbutang og bike lanes. Apan human mapalabang ang Sugbo Bike Lanes Ordinance niadtong 2014, puro ra laway ang among nakuha.
TRABAHO
Alang sa kasayuran sa tanan, ang Sugbo Bike Lanes Ordinance sa Dakbayan sa Sugbo, produkto sa paninguha sa tanang mga siklista sa panahon ni Bise Mayor Michael Rama. Naumol ang Tindak Sugbo nga girepresentahan sa tanang bike organizations dinhi.
Ang naninguha nga maporma mao ang magsuong negusyante nga sila si Joel ug Edna Lee. Ilang pamilya ang nanag-iya sa Elicon. Ang mga meeting diha usab gipahigayon. Usa ko sa mitambong. Human sa daghang mga konsultasyon ubos sa pakitambayayong ni kanhi konsehal Nida Cabrera, ang ordinansa anam nga naporma hangtod nga napasar.
Di pa ko kalimot nga usa ka ko sa mga representante nga namulong atubangan sa konseho sa usa ka session sa wa pa gipasar ang ordinansa.
MIUNDANG
Human sa daghang tigom kay giumol ang bike board, niundang ko. Ngano? Samtang naminaw ko sa among mga meeting, ako nang gihimadlan nga kini way padulngan. Ako gyud nga natag-anan. Sukad sa 2014, bisan badlis wa koy nakit-an.
Ang kataw-anan, ang Mandaue City nga way ordinansa sa biseklita, nakabutang og bike lanes. Ang Cebu City nga naa sukad pa sa 2014, bisan badlis lagi wa gyud.
Hinaut pa Mayor Edgardo Labella, isip fitness buff kay hilig ka man sa running, mapadali nimo ang board sa paglihok. Sa pagkatinuod lang, amo nang nahan-ay ang blue print anang bike lanes pinaagi sa Tindak Sugbo. Ang inyo na lang, pagpalit og pintal ug pagbadlis sa dan.