KINING maong pangutana maoy nisantop sa akong hunahuna human makabalita nga mohangyo si Mayor Edgar Labella nga di intawon ibutang sa ECQ kun enhanced community quarantine ang Syudad sa Sugbo.
Klaro man gud ang mga statistics nga gimantala sa Cebu City Hall mismo kabahin sa pagsaka sa mga positibo sa Covid-19 dinhi sa syudad. Ang Syudad sa Sugbo na ang nag-una sa kadaghanon sa gipang-Covid 19 sa tibuok nasud.
Gawas sa numero, makita na sab ang kakulang sa mga ICU beds bisan pa sa kadaghan sa mga hospital sa Sugbo bisan pag iapil ang mga naa sa Syudad sa Mandaue ug sa Syudad sa Lapu-lapu.
Grabing panghambog sa mga propagandista sa syudad nga gamay ra ang mga nangamatay. Gihimong key performance indicator (KPI) ang kamatayon tungod sa Covid-19.
Tulo lang ka pangutana ang akong masulti niining kadaghanon sa kamatayon.
* Unsay nabuhat sa Cebu City Hall kabahin sa paglahutay sa mga pasyente aron dili mamatay?
* Nasiguro ba ang Cebu City Hall nga gamay lang ang mamatay sa mga nanga-ICU karon?
* Moangkon ba og kasaypanan ang Cebu City Hall kon simbako modaghan ang kamatayon karon?
Nakapangutana ako niini kay naa man guy mga tigdepensa sa Cebu City Hall nga niingong sala ba diay sa mayor kon ang usa ka barangay kapitan wala dawata sa mga hospital kay puno na?
Hmmm. Si Foreign Affairs Secretary Teddy Locsin mismo ang nangayog pasaylo sa Britain tungod sa kamatayon sa usa ka British national kay gi-ataki na lang human sa pipila ka oras nga pagpangitag bakanteng hospital bed dinhi sa Syudad sa Sugbo.
Alang kanako man gud, mas maayo kon moangkon si Mayor Labella sa kagrabi sa kahimtang sa Sugbo ug basi niana, mohangyo siya sa tanan og kooperasyon.
Dili siya mangita og lusot ug mamasangil hinuon sa kaatbang. Moingon ra ba dayon nga mag-imbestigasyon. As if dunay resulta ang tanan niyang gipang-imbestiga sukad siya nidawat sa maong responsibilidad isip mayor.
Ang nakasamot karon kay 25 ka mga elemento sa kapulisan nga assigned sa city director’s office ug sa operations ang gipang-covid.
Lain sab ang namatay ug mga positibo sa mga empleyado sa buhatan sa MCWD. Nangatakdan sila human niadtong tigum sa mga kapitan ug sa mayor sa ilang social hall?
Wa na unta siya mangayo pag reconsideration kay bisan og pang face saving, di gihapon epektibo. Taktaka ang nitambag niini mayor.
Ang importante karon kay magporma ka og mas epektibo nga team nga mopakanaog mismo sa gikinahanglan. Ayaw unaha ang PR team nga modepensa nimo. Bisan unsaon nimog pintal ang balay nga naghibat, naghibat gyud na. Ayuha una ang balay. (@anol_cebu sa Twitter)