Genoguin: Ekonomiya sa Pinas patay na

SULOD ning unom ka bulan nga mihugpa kining pandemic nga Covid-19 sa atong nasud ug sa tibuok kalibutan, halos tanang mga negusyo magagmay man o dagko, pulos nangahagba, ang nahimong makaluluoy ang mga yanong trabahante.

Dinhi sa atong Dakbayan sa Davao, duha ka ilandong hotel, ang Marco Polo ug Grand Regal, nagtak-op na kay mokita lang ning mga klase sa hotel kung adunay mga langyaw nga mibisita sa siyudad, pero bisan pa og lokal nga tourist, wala na’y mo check-in tungod sa atong sitwasyon sa Covid-19.

Sigurado ta nga sa sunod tuig apektado gyud ang atong tinuig nga budget sanglit dili madali ang pagbangon sa mga dagko ug gagmay’ng mga negusyante.

Dili pa gyud ta makasiguro kon makabawi dayon kay hangtud karon wala pa’y napalgan nga bakuna alang masanta kining sakita. Ug tungod niini, magpabilin nga wa’y klarong income ang atong panudlanan sanglit naa man sa buhis ang kinabuhi sa atong gobyerno.

Kon magpadayon man ang Build, Build Build project sa atong kagamhanan, kana tungod daghan ang mogarantiya nga pahulamon kita para sa atong inprastraktura, maayo nalang bisag hulam basta naa lang kaysa wala.

Dili na isyu kon magkadako ang atong utang, kay daan naman kining gihimo sa atong nanglabay nga presidente ug gisunod lang ni sa atong kasamtangan nga pangulo, Rodrigo Duterte, butang nga atong gipasalamatan kaniya, tungod kay gikaya niya pagdala ang atong nasud niining dili ti-aw nga pagsulay nga nahitabo sa iyang administrasyon.

Sa karon, patay na ang ekonomiya sa atong nasud tungod sa pandemya. Apan sa atong paglantaw, sa hinayhinay, kaya niyang ibalik ang atong nagkagusbat nga sistema hangtud asa kutob kining pandemya sa atong nasud.

Subo lang palandungon, kay sa panahon unta nga ingon niini, kalimtan ang politika, ug magtinabangay kita aron makapangita og paagi kung unsaon pagsulbad kining kaaway nga dili makita. Apan, inay mutabang, naghinan-aw lang ug nagpunay og saway ang mga oposisyon sa gihimo sa administrasyon.

Apan pasalamat kita kay solid pa ang suporta sa mga katawhang Pilipino sa atong presidente ug kaya niya ang bug-at nga problema nga gi-atol pa gayod sa iyang panahon.

Hangtud asa kaha kutod kining dakong problema nga giatubang sa atong nasud? Atong suportahan ang atong gobyerno kon unsay imando nga dili maggawas ang walay tuyo, atong tumanon alang manglayas kining nagtuyok-tuyok nga kagaw sa atong palibot hangtud nga mahibalik kita sa normal nga sitwasyon ug panginabuhi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph