COTABATO CITY -- Usa ka terorista ang nadakpan sa mga awtoridad alas 8:25 sa buntag niadtong adlaw nga Sabado sa probinsya sa Maguindanao.
Giila ang suspek nga si Norhasim Esmael, alyas Momong Esmael, 25, minyo ug molupyo sa probinsya sa Maguindanao.
Gibutyag ni Isulan Chief of Police Lieutenant Colonel Modesto Carrera nga nadakpan ang suspek sa hiniusang puwersa sa Special Action Force (SAF) Battalion, Sultan Kudarat Intel Unit, Ampatuan Intel Unit, Sultan Kudarat Highway Patrol Group ug Isulan MPS sa Barangay Poblacion, Isulan, Sultan Kudarat.
Si Esmael maoy gitudlo nga utok sa pagpamomba sa Isulan Sultan Kudarat niadtong tuig 2018.
Ang suspek gitumbok nga miyembro sa Bangsamoro Islamic Freedom Fighters ubos sa grupo ni Shiek Esmail Abdulmalik alyas Kumander Abu Toraife.
Ang dinakoan mag-atubang sa mga kaso nga five counts sa complex murder with multiple frustrated murder nga giisyu sa korte sa Isulan.
Sa kasamtangan, ang suspek gibalhog sa custodial facility sa Isulan Philippine National Police ug gitakda nga i-presenta sa korte Lunes, Hunyo 22.