STA. CRUZ, Davao del Sur -- Naabtan sa mismong bana ang iyang 39-anyos nga asawa nga maayong pagkapatong sa iyang kumpare samtang pulos wa’y sinina ang duha sud sa usa ka balay didto sa Barangay Zone 2, kaadlawon niadtong Sabado, Hunyo 20, 2020.
Sa taho gikan sa Sta. Cruz Municipal Police Station, nangayo og responde kanila ang usa ka Joseph, 35, construction worker nga residente sa Sitio Molobolo, Barangay Little Baguio, Malita, Davao Occidental.
Matod sa bana nga nadiskubrihan niya nga ang iyang asawa nga si Maisa (apilyedo gipugngan) nga gikabit sa iyang kumpareng si Angelito, 40, silingan niini sa ilang lugar.
Dihang natultulan niini ang pinuy-anan sa duha gilayon kining mitaho sa istasyon sa kapolisan ug didto na giadtoan ang maong lugar.
Hilabihan ang kakurat sa bana human naaktuhan ang gibuhat sa iyang asawa nga maayong pagsakay-sakay sa lawas sa iyang kumpare nga daw nag-joy ride sa sakyanan.
Gilayong nasikop sa mga otoridad ang duha ug gipailawom na sa ilang kustodiya.
Dugang ni Joseph nga kapin 10 ka tuig nga gilumloman sa iyang kumpare ang iyang asawa apan ning higayona lamang siya nakahigayon nga bweltahan ang duha aron maundang na ilang iegal nga binuhatan.
Gihikay na sa kapolisan ang kasong atubangon sa duha human desidido ang reklamante nga asuntuhon ang mga nahisgutan.