APPROVED in principle” na ang pagpabalik sa backriding sa mga motorsiklo, sumala pa ni Presidential Spokesman Harry Roque. Apan wa kini magpasabot nga mahimo na nga moangkas sa motorsiklo. Mahimo lang kini kon luwatan na sa technical working group (TWG) ang guidelines nga maglakip sa proteksyon sa pagtakod sa Covid-19.
Matod ni Roque, ang TWG maoy gitahasan sa pagmugna sa lagda alang sa labing luwas ug epektibong pamaagi nga kaminosan ang pagtakod sa Covid-19 niadtong moangkas sa mga motorsiklo. Ang pag-angkas sa motorsiklo gidili ubos sa gipatuman nga kuwarantina, bisan ubos sa general community quarantine (GCQ). Apan gisaway ang pagpatuman niini bisan sa mga sakop sa pamilya nga nagpuyo sa usa ka panimalay, ilabi na sa mga magtiayon ug bisan niadtong nanagpuyo lang nga magdulog sa pagpangatulog.
Ang mga motorsiklo mao ang labing mahinungdanon nga paagi sa transportasyon sa katawhan, ilabi na sa lagyong mga dapit nga way laing kasakyan ang mga tawo. Labi na gipahunong ang tanang matang sa public transport tungod sa Covid-19 pandemic, lakip na sa mga jeepney.
Ang mga jeepney wa pa makabalik sa pagbiyahe. Sulod sa pipila na ka tuig, nagplano ang gobyerno sa pag-phaseout sa mga karaan ug kagang-kagang na nga mga jeepney. Ang Covid-19 pandemic naghatag og kahigayonan sa gobyerno sa pagpahunong sa tanang mga jeepneys, ang gitawag nga “king of the road.”
Kon wa nay mga jeepney, way laing kadangpan ang mga tawo kon di ang mga motorsiklo nga makasulod bisan kon bati ang mga karsada. Bintaha didto sa Cabadiangan kau gipaaspalto man ni Gobernador Gwen Garcia kaniadto pa.
Apan unsay mahitabo niadtong mga motorcycle taxis sama sa Angkas? Ang Department of Ttransportation (DOTr) niingon nga nahuman na ang ilang pilot study sa mga motorcycle taxis niadtong buwan sa Abril.
Sa pagkakaron, illegal ang motorcycle taxis, gawas lang kon magpasar ang Kongreso og balaod nga magtugot kanila isip usa ka mode of public transportation. Ang DOTr niingon nga ang tanan nilang mga rekomendasyon ila nang gisumitir sa House of Representatives.