HUMAN sa dul-an sa upat ka buwan nga pagkatanggong sa Manila, usa ka ginang nabalik na sa ilang balay sa lungsod sa Minglanilla. Ang nakapait kay pag-abot niya sa ilang balay, wala sab maabti ni Liza Angkay Cellote ang iyang bana nga si Ritche kay gidala sa tambalanan tungod kay nagsakit ang kasingkasing.
Mao ni ang masulob-ong asoy ni Liza nako gahapon, usa ka adlaw human siya nabalik sa iyang pamilya sa sityo Pitogo 2, Barangay Cuanos, Minglanilla.
"Paita sa akong kahimtang Sir. Di pud ko pwedeng moduaw sa akong bana sa ospital, kay ikuwarantina pa man ko og katorse ka adlaw," asoy ni Liza pinaagi sa cellphone.
Ang kalbaryo ni Liza nagsugod sa dihang naabtan siya og lockdown sa San Andresbukid, Manila City niadtong Marso.
Naabot siya sa Manila niadtong Pebrero 27, kauban ang iyang igsuon nga si Teresa ug bayaw nga si Glenda aron mangaplay pagkakatabang sa balay sa nasod sa Saudi Arabia.
Usa ka apartment ang gipapuy-an sa agency nga maoy nag-process sa ilang mga dokumento. Tungod sa Covid-19, na-stranded sila sa apartment dul-an sa upat ka buwan.
"Pasalamat lang sab mi sa agency kay libre man ang among pagpuyo. Libre pud ang paniudto ug panihapon," dugang asoy ni Liza. Matod niya subra sa 40 sila ka aplikante ang gipapuyo sa apartment.
Gikan sa iyang pagkatanggong hangtod sa iyang pagpauli, padayon ang among komunikasyon. Nangayo siya og tambag sa pagsugod sa lockdown. Ako siyang gidasig nga di magpawala sa paglaum. Hugot nga pag-ampo ug pakig-alayon sa barangay maoy buhaton aron nga sila makapauli sa Sugbo.
Gipasulayan sab nako niya og subay sa internet ang mga ahensiya sa gobyerno basin matabangan sila. Apan way nahitabo. Resulta ang ila pa ganing pamilya ang nagpadala og pamilite sa ayroplano.
Bisan usa ka sentemo way ayudang naabot para pamilite. Hinuon iyang gitug-an nga wa gyud pud sila pasagdai sa barangay kansang ayuda sama sa pagkaon gipaagi ngadto sa ilang agency.
Karon ang problema ni Liza, asa man siya ipakaon sa iyang pamilya nga di pa man siya pagawson sa balay? Ang barangay? Ang munisipyo?
Palihug og susi sa kahimtang ni Liza, iyang igsoon nga si Teresa ug bayaw nga si Glenda. Looy. Manimpad unta sa Saudi, lockdown maoy na-ani.
Sa pikas nga bahin, sa Minglanilla lang gihapon. Mga mananoy ug makawala sa kalaay nga komposisyon sa batid sa saxophone nga si Joefre Capangpangan ang iyang halad sa tanan ning panahon sa pandemya.
Matod ni Joefre, sukad pa niadtong Marso hangtod karon wala na siyay tukar nga maoy iyang gibuhi sa iyang pamilya.
Gumikan niini nadasig siya pagsipra sa labing unang higayon og napulo ka komposisyon aron maporma ang usa ka album nga giulohan og I Wanna Go Home.
"Para ni sa mga OFW ug sa tanan nga na-stranded tungod sa Covid19. Kauban sab sa album ang siyam ka love songs nga mogitik sa pagbati sa matag usa nato ning panahon nga naa ra ta kanunay sa balay," asoy ni Joefre sa iyang messenger nga gipaambit diri kanako.
Gusto unta ni Joeffrey nga ipaambit kini pinaagi sa on line sa kantidad nga P650 aron masaparan ang panginahanglan sa iyang pamilya diha sa Minglanilla.
"Lisod man nga ipaagi sa CD sa atong sitwasyon karon. Mao nga nakahunahuna ko pagmugna ning maong album, iyawat nalang naay makagustong mopalit, kay pwerte na gyung lisura," sugilon ni Joeffrey.
Bitaw kinsa may wala makaila sa kahanas ni Joeffrey sa pagtukar gamit ang saxophone diha sa Slabadu RestoBar. Gani nakaani na siya og daghang pagdayeg ug nakaangkon og daghang fans sa iyang way tihiktihik nga stage performance.
Atong tabangan si Joeffrey ug ubang musikero nga nagrabihan og maayo ning pandemya nga atong giatubang. Sa dugang kasayuran makontak siya sa iyang cellphone 09293415428. Daghang salamat.