NAGPATABANG sa City Health Office (CHO) ang walo ka mga indibidwal kinsa nagpositibo sa rapid test nga gihimo sa ilang kompanya nga wala’y koordinasiyon sa lokal nga kagamhanan sa Siyudad sa Cagayan de Oro labi na sa health authorities.
Nasuko si Mayor Oscar Moreno sa gihimo sa maong kompanya ug sa duha ka mga laboratoryo nga pribado nga nagpahigayon og rapid diagnostic test nga wala man lang nakigkoordinar sa CHO labi na nga duna’y nagpositibo.
Gibutyag ni Dr. Joselito Retuya, City Epidemiologist sa CHO, nga duna sila’y nadawatang mga tawag mismo sa maong mga hingtungdan kinsa nagpositibo sa rapid test ug nagpatabang gumikan kay wala sila masayod sa ilang sunod nga buhaton.
“Actually nagpatabang sila unsay ilang buhaton so far ang natawagan na or nakatawag ug atong nahimoan og initial nga contact tracing kay mao man pud atong pamaagi ani maghimo ta og contact tracing dili lang sa mismo nga positibo apil na sa ilang close contacts,” matud ni Retuya.
Giingong sa ilang listahan anaa na sa walo apan posibleng mosaka pa usab kini kay duna pa man silay mga gakadawatang mga tawag.
“Ang atong listahan dinhi niabot na og siyam, no walo siya and I’m sure nga naa karo’y nagtawag karon kay nagtext sa akoa og asa siya manawag,” dugang niini.
Giingong gipahigayon na ang contact tracing ug gitakdang ibalhin na kini sa city isoaltion units (CIU) aron nga makuhaan og swab sample ug masuta ang resulta sa reverse transcription-polymerase chain reaction (RT-PCR) test nga mao’y confirmatory test.
“Ang katong mga na traced na nato, naa na ta’y mga initial tracing and investigations done ato silang paninguhaon nga ma extract karong adlawa atong ibalhin sa atong CIU aron didto na nato himuon ang RT-PCR swabbing anytime this day,” dugang pa.