USA ka frontliner nga pulis ang patay human naugbok ang ulo sa dan dihang nadisgrasya sa iyang motorsiklo, Lunes, Hunyo 22, sa alas 8:30 sa buntag sa Sitio Tigbao, Barangay Talamban, dakbayan sa Sugbo.
Si Alex Cubelo, 33, minyo taga Barangay Guadalupe, dakbayan sa Sugbo ug sakop sa Talamban Police Station sa Cebu City Police Office (CCPO), namatay kini paglabay sa 30 minutos dihang nadala sa North General Hospital.
Si Major Jonathan Taneo, hepe sa Talamban Police Station nga nahinabi sa Superbalita Cebu nga ang iyag sakop nga si Police Staff Sgt. Cubelo, sakay sa iyang 150 Honda XR, padulong mo-duty sa Quarantine Control Points (QCP) sa Pit-os dihang mi-overtake sa laing pribadong sakyanan. Tungod kay dangog gumikan sa pagsige og uwan na-slide ang motorsiklo. Tungod sa kakusog sa impact, naugbok ang iyang ulo.
Nag-helmet siya apan ang helmet nga gigamit kay susama ra sa helmet sa bisiklita nga igo lang gipatong sa ulo.
Gipadayag niini nga nagdali si Cubelo aron dili ma-late sa iyang pag-duty sa QCP sa Pit-os.
Matod pa niini nga nasubo sila sa sayo nga pagtaliwan sa iyang kugihan nga sakop.
Giabangan na nila ang asawa niini pamilya gawas sa mga benepisyo nga madawat gikan sa PNP.