GIPAMATAY sa mismong apo nga 24 anyos ang apohan nga nagpadako niya ug gidamay pa sa pagtigbas ang uyoan ug ang silingan niini.
Ang insidente nahitabo Sabado sa gabii didto sa Purok-1B, Barangay Del Monte, Samal District, Island Garden City of Samal (Igacos), Davao del Norte.
Si Police Master Sergeant Hellie Jovellano, imbestigador sa Igacos Police Station, nag-ila sa suspek nga si Arjay Lopez Gevana, alyas Adi, 24 anyos, mag-uuma ug molupyo sa dapit.
Nasayran nga napalgan nalang nga nagkadugo ug wala nay kinabuhi ang mag-apohan sa suspek nga sila Alejandro Gevana, 87, ug Leona Lopez Gevana, 84.
Ang mga biktima gipanigbas gamit ang lagaraw kinsa nagkaangkon og daghang samad tinigbasan sa kalawasan nga maoy hinungdan sa ilang kamatayon.
Naa sab sa pikas kuwarto, nagkadugo ug nagpakitabang ang uyoan niini nga si Mario Lopez Gevana.
Gidamay sab sa pagtigbas ang silingan nga si Marlon B. Rafael kinsa sa maong takna miadto sa balay sa mga biktima gumikan sa kasamok.
"Nag-amok ning suspek, allegedly nalisoan sa maayong pangisip. So far, na detained na nato ang suspek ug giandam na ang kaso sa iyaha. Mag-agad nalang ta sa korte unsay hukom kung mapamatud-an nga nalisoan gyod ang suspek," sulti ni Jovellano pinaagi sa telepono.
Sa kasamtangan, gipanghaya na ang duha ka apohan samtang anaa na sa luwas nga kahimtang ang laing duha pa ka biktima.