KIDAPAWAN CITY -- Nagpasidaan karon ang Regional Anti-Crime Unit sa Police Regional Office (PRO)-Soccsksargen sa mga netizens nga nalingaw sa paggamit sa nauso nga FaceApp ug TikTok.
Matud ni Major Leo Dofelis, ang nangulo sa Regional Anti-Crime Unit, delikado ang mobile application sa personal information sa usa ka user kung diin sa pag-install pa lang niini dunay security risk na nga mahitabo.
Sa pag-uyon sa user nga ma-access sa FaceApp ug TikTok, ang tanan nga personal data niini susama e-mail account, credit card ug mga passwords sa ilang social media accounts makita.
Dugang ni Dofelis nga sa pag-acess pa lang sa FaceApp ug TikTok, makakuha na ang mga hacker og impormasyon nga posibleng ilang gamiton sa paghimo sa Facebook account ug cyber crime.
Panawagan sa opisyal sa tanan nga susihon pag-ayo ang terms and agreements sa gamiton nga mobile apps.
Tumong niini nga maprotektahan ang mga users gumikan wala silay magukod o makasuhan kung silay mabiktima.
Ang FaceApp usa ka sikat ug nauso karon nga mobile app kung diin ang user puwede niya nga bag-ohon ang iyang nawong susama sa babaye, lalaki, tigulang, bata ug uban pa nga opsiyon niini.
Gipahibalo sab sa Regional Anti-Crime Unit sa PRO nga ang TikTok sab delikado sa mga user susama sa FaceApp. (Edgar Fuerzas)