MOKABAT P12 milyones ang gibana-banang danyos sa sunog nga natigayon mga alas 7:00 sa gabii sa Binonoan Creek, Max Suniel-Mabolo St., Carmen sa siyudad sa Cagayan de Oro.
Sa inisyal nga rekord, mokabat 82 ka mga panimalay ang naugdaw. Adunay mga naguba nga mga establismento sama sa padala center, bangko ug uban pa nga anaa sa area.
Matud ni Fire Inspector Sam Lawrence Velarde, ang ground commander sa Bureau of Fire Protection (BFP), nga ang sunog gitumbok naggikan sa puloy-anan ni Roger CabaƱeros.
Giimbestigahan pa usab ang report nga giingong duha ka mga lalaki ang miagi sa naasoyng puloy-anan ug giingong giawhag sa binuhing iro. Maoy namatikdan nga kalit miulbo ang kalayo.
"Sa pagkakaron, kinahanglan pa kana nato nga imbestigahan considering walay nakaila sa duha ka tao. Kung naay gidudahan atong imbitahan para tan-awon unsay cause," matud ni Velarde.
Dugang niini nga gideklarar nga fire out ang sunog mga alas 12:06 kaganina sa kaadlawon. Mapasalamaton sab kini nga naprotektahan ang dakong unibersidad ug barangay hall nga makita duol lang kaayo sa maong dapit.
Nagpadayon sab ang pahimangno sa BFP sa katawhan nga malikayan ang sunog sa tagsa tagsa ka panimalay.
"Continuous atong pahimangno kay ang sunog di malikayan unless kung gituyo siya. Isa gyod sa pahimangno nga dili biyaan ang niluto, ang mga bata bantayan, mga daan nga balay ang electrical wiring susihon, samtang magbantay ta likay Covid magbantay pod ta likay sa sunog," tipik sa pahayag niini.
Ang mga nasunogan anaa karon nagpahimutang sa Carmen National High School kon diin mga pamilya sa nasunogan ang nanawagan og tabang labina mga sapot ug importanteng butang human lakip sa naugdaw sa sunog.