MOABOT 6,347 ka mga masinupakon sa balaod ang natala sa Police Regional Office (PRO)-Northern Mindanao samtang gipatuman ang striktong implementasyon sa community quarantine sa pakigbatok sa coronavirus disease (Covid-19).
Sa kasamtangan, ang PRO-Northern Mindanao sa liderato ni Police Brigadier General Rolando Anduyan ang padayon sa implementasyon sa mga gabayan ubos sa modified general community quarantine.
Basi sa records gikan sa March 17 ngadto June 15, adunay 4,260 ka mga violators ang gipangwarningan.
Mokabat sab sa 1,501 ang napenaltihan, 128 ang giaresto ug 106 ang gipasakaan og kaso human nakasupak sa curfew.
Samtang 385 ka indibidwal ang naaresto tungod sa walay pagrespeto o disobedience ug 356 ka kaso ang napasaka atol sa implementasyon sa community quarantine.
Kini sab nga period adunay 73 ka tao ang naaresto sa pagsupak sa overpricing/profiteering.
Pabilin ang pag-establisar sa PRO-Northern Mindanao sa 67 quarantine control points sa Joint Task Force sa provincial boundary ug regional boundary sa Northern Mindanao.
Samtang 649 ka mga personahe gikan sa Quick Response Team ang gipahimutang sa mga siyudad ug probinsya kini aron masiguro ang seguridad sa katawhan og naimplementar ang social distancing ug mga gabayan diha sa checkpoint labina pagsusi kon ang mga gi required og travel authority wala ba makasupak niini.