NAKOMPLETO sa Philippines E-Gilas squad ang 5-game sweep nga dominasyon niini batok sa Indonesia aron angkunon ang titulo sa Southeast Asia conference sa first FIBA Esports Open.
Sa ikalima ug katapusang duwa nga gikombati niadtong Dominggo, Hunyo 21, 2020, ang E-Gilas nakasugakod sa rally sa Indonesians aron irehistro ang laing dakong kadaugan, 71-35.
Ang Samahang Basketbol ng Pilipinas (SBP) mapasigarbuon sa naangkong kalampusan sa E-Gilas.
“Many congratulations on the 5-0 sweep,” asoy ni SBP president Al Panlilio. “Thank you, Team Pilipinas. SBP is very proud of you all. Keep on playing and improving for future FIBA esports tournaments. Remain humble but hungry.”
Gawas sa Pilipinas, gipatigbabawan sab sa Australia, Argentina, Italy, ug Saudi Arabia ang ilang tagsatagsa ka mga grupo. (ESL)