KALIT nawagtang ang pagka katulgon kagahapon sa udto dihang naabot nako ang istorya nga duna diay nagpositibo diri sa among subdivision sa Syudad sa Talisay. Ang balay pa gyud diin naa ang tindahan nga among palitan og itlog ug ice.
Nakakita ang mga silingan nga dunay nag-PPE suits nga nikuha og usa ka border nga nagpuyo sa usa ka kwarto sa maong balay sa miaging Sabado pa. Pag Lunes lang mi nakahibawo. Ug pag Father’s Day, didto mi namalit og ice.
Ambot lang ninyo kon makahibawo nga dunay positibo nga silingan. Basta ako hapit mahulog sa katre kay naghigdahigda man.
Dali kaayo akong nakasubay sa tibuok istorya ug nakaamgo sa kakuyaw nga maabot na gyud namo ang Covid-19. Usa diay kadto sa 17 nga gianunsyo ni Mayor Samsam Gullas sa iyang Facebook nga gi-isolate.
Bag-o lang kita nakabasa pag weekend sa Facebook sa nahitabo sa Barangay Pari-an diha sa Syudad sa Sugbo nga igo lang nipalit sa tindahan diin duna diay na PUM. Natakdan kini ug dunay Covid-like symptoms.
Apan wala sila gi-entertain pagtarong sa barangay. Nahutdan sab ang cluster clinic sa Tinago og rapid test pag-adto nila. Namatay gyud intawon.
Ang bana sa usa ka suod nga kaila nianha og hospital sa Fuente Osmena kay giataki sa hubak. Nah, natakdan kinig Covid ug namatay usab.
Naa say nga suod nga higala nga dentista ug abogado nga natakdan uban sa asawa. Naa pa sila sa hospital.
Di ka mapugwat nga gawas nga mga suod nga ang nangatakdan, naa pa gyuy nahitabo nga nagkaduol asa ang among balay. Mao kini ang dapit diin kami sa pamilya nag-lockdown mismo sulod sa tulo ka bulan.
Sa ingon niini nga kahimtang, di lang angay i-lockdown ang among silingan nga balay diin nagpuyo ang napositibo. Kay naa diha ang usa ka sari-sari store nga anha mamalit ang mga silingan, mas maayo nga ma-lockdown ang tibuok subdivision sulod sa 14 ka adlaw ug mapahigayon ang mass testing.
Ang nakanindot lang diri sa Talisay kay abtik mismo mo-distribute ang barangay ug sitio sa mga tabang gikan sa City Hall. Wa mahitabo ang kagubot sa distribution nga nahitabo diha sa Syudad sa Sugbo kay giapilan man og politika.
Sakto sab nga wa na sila mag-repack sa bugas. Kay gawas nga makaduda ang repacking, magkinahanglan sab og dugang manpower nga sweldohan. Ngano man diay og sinako na ang ihatag sama sa nahitabo diri sa miaging semana.
Nalipay ko kay walay isyo kabahin sa overprice diri sa among syudad kon itandi sa Syudad sa Sugbo diin naa gyuy pinirmahan nga dokumento si Byron Garcia apan wala pa makaandam og tubag si city administrator Floro Casas.
Kabahin sa isyo sa donated dressed chicken, naa kunoy namaligya nga opisyal diha sa Barangay Basak-San Nicolas. Please unahag imbestigar Mayor Labella.
(@anol_cebu sa Twitter)