BALAOD. Tungod aning sakit nga Covid-19, nga giingon makatakod ang luwa, hatsing o sip-on, angayan na nga dunay nasudnong balaod nga nagdili sa pagpangluwa bisan asa labina sa mga publiko nga dapit.
Ang balaod di lang sama unta sa Singapore nga latigohon sa publiko ang madakpan apan kinahanglan nga dako og multa ug hataas ang sentensya sa mapriso aron ang tanan magmatngon.
Ang dakbayan sa Mandaue nag-umol na og balaodnon nga nagdili ni bisan kinsa nga mangluwa o maghugawhugaw sa kadalanan o sa dapit nga publiko sa dakbayan. Ang masakpan mamultahan ug kon di makabayad sa multa makalabuso.
Mas maayo man unta kon ang balaod nasudnon, kanang gipasar sa kongreso kay ang multa ug sentensya sa mapriso uniporme unya ang kapulisan man ang mopatoman niini. Ang problema man gud sa city o municipal ordinance kay ang implementasyon way klaro.
Samtang wa pa makahunahuna ang kongreso nga mopasar ani nga balaod kay ang ilang giatiman karon ang renewal man sa franchise sa ABS-CBN, maayo unta nga mapasar na kining balaodnon sa dakbayan sa Mandue aron dunay masampolan unya.
Apan dunay obligasyon ang dakbayan sa Mandaue duyog sa pagpatoman unya ning maong ordinansa. Ang dakbayan kinahanglan nga magbutang og mga basurahan sa mga dapit publiko o sa kadalanan sama sa gibuhat sa mga datu nga nasud aron pagseguro nga dunay kabutangan sa hugaw o basura sa mga tawo nga manglakaw.
Maayo unta nga mosunod ang mga silinganan dakbayan sa Mandaue ingon man sa mga kalungsoran nga mopasar og susama nga ordinansa aron mayoniporme ang pagiplementar sa kalimpyo sa Sugbo.
Samtang karon nga wa pa ang nasudnon balaod nga magdili sa pangluwa o hugawhugaw bisan asa labina sa dapit publiko, atong awhagon atong mga kaigsoonan nga magtinir ta sa kalimpyo. Di na ta angayan nga mohuwat pa sa maong balaod aron atong bansayon ug sundon ang husto nga lagda sa panglawas aron mahanaw na ni si Covid-19.
Happy Father’s Day sa tanan ingon man sa mga sulondon nga inahan!