SUNOD semana July na pero maorag wa pa gyud gihapon ta’y nakit-an bisan gamayng paglaum nga sarang makahatag og alibyo ning pandemya karon.
Mas nigrabe pa hinuon sa kadaghan nang nag-positive ug nangamatay apil na ang mga personalidad sa Sugbo tungod sa Covid.
Hasta diay ang usa ka sikat nga Cebuana singer nag-positive sad sa maong virus niadtong Mayo.
Ang duda sa singer nga sa ospital ra niya nakuha ang Covid kay padung man siya manganakay niadtong Mayo.
Luwas na hinuon ang 43-anyos nga singer ingon man ang iyang `miracle baby.’
BARON NAG-VIRAL
Gipistahan sa mga netizen ang litrato ni Baron Geisler nga lago kaayog nawong samtang nagpungko daplin sa dan sa IT Park niadtong Sabado mga alas 6:15 sa buntag nga naghukas ug nanigarilyo.
Ang uwahi nakong nahibaw-an nga nagpakitabang siyang makauli sa Cebu kay gimingaw na siya sa iyang asawa ug anak human natanggong siya sa Manila tungod sa ECQ.
Manghinaot lang ta nga sayup ang espekulasyon sa mga netizen nga nibalik na sad sa naandan niyang bisyo ang aktor.
NO LOVELIFE
Bisan ang mga taga-showbiz maorag gustong mosakay karon sa popularidad ni Pasig Mayor Vico Sotto. Sama sa aktres nga si Bea Alonzo nga gihatagan og malisya sa mga netizen dihang nakuhaan ni og hulagway kauban si Vico.
Nahitabo ni dihang gihatod sa foundation ni Bea ang mga donasyon nilang bag ug disinfectants ngadto sa mga frontliner sa Pasig.
Apan imposibleng ma-link si Vico kang Bea kay klarong dili prayoridad sa mayor ang lovelife.
Bisan pa sa iyang pangidaron nga 31 ug “no girlfriend since birth.”
DTI INUTIL
Kon nakabantay mo halos nimahal gyud tanan karon ang mga palaliton. Tungod ba kaha kay limitado ra ang mga stock o wa lang gyuy puangod ning ubang mga negosyante.
Suwerte na kon makapalit ka og alcohol ug Vitamin C nga walay patong tungod sa kanihit.
Hinuon ang nakaayo lang sad kay medyo maka-save ta karon kay wala na may suroysuroy ug naa na lang magyampungad kanunay sa balay.
Sige lang basin karong July makaginhawa na ta gamay. Maluoy ang Ginoo.