SA HULYO na ang sunod nga session sa konseho sa dakbayan sa Lapu-Lapu.
Kini human nga nipaubos sa self quarantine ang mga konsehal ug si Bise Mayor Celsi Sitoy sa dakbayan human nga nagpositibo si Konsehal Rico Amores sa coronavirus disease (Covid-19) sa miaging semana.
Gikompirma kini ni Konsehal Flaviano Hiyas, ang majority floor leader sa konseho.
Gibutyag ni Hiyas nga bisag wala makatambong sa labing uwahi nilang session niadtong Huwebes, Enero 18, si Amores naniguro na lang sila sa ila usab nga kaugalingon.
Giklaro ni Hiyas nga sukad sa pagsugod sa community quarantine sa dakbayan nisunod ang konseho sa physical/social distancing sa ilang mga session ug kanunay usab silang mag-mask.
Wala na usab sila maglamanohay sa usa’g usa sukad nag session sila niining panahon sa community quarantine.
Sa pagkakaron wala hinuoy gipamati sa lawas ang mga sakop sa konseho sumala pa ni Hiyas.
“Wa lang ko magpa swab kay ang protocol man gud sa IATF nga kung dunay mag positive or duna kay acquintance ato nag positive is kwarantinas man lang. Magpa swab test ka kung nagpakita ka sympmtons mahal baya sad ang swab so ako wala lang sa ko kay daghan baya kaayo sa atong kaigsuonan nga wala gyud intawon mapa swab test unya diay mga konsehal bisag way symptoms magpa-swab so may nang magamit na ang resources sa local government ngadto sa nagkinahanglan,” matod ni Hiyas sa Superbalita Cebu. (GCM)