MAHATAG na ngadto sa gatusan ka libo ka pamilya sa dakbayan sa Sugbo ang tag 25 kilos nga bugas humay sa unang semana sa Hulyo.
Si Konsehal Raymond Garcia, majority floor leader sa konseho,nagkanayon nga nagsugod na og hatod ang mga supplier hangtod mahuman ang 80 ka barangay.
Sama sa miaging distribution, ang tag 50 kilos nga bugas i-repack aron mabahin sa tag 25 nga maoy madawat sa matag pamilya.
“Walay problema sa supply kay daghan man og supplier ug dagsa man ang bugas karon itandi niadtong Marso so wala gyud tay problema pero just allow us bisan duha ka semana para ma fully delivered ang bugas to the 80 barangays in Cebu City,” pagtug-an ni Garcia.
Si Garcia nagkanayon nga pangulohan sa Depaetment of Social Welfare and Services (DSWS) ang distribution sa bugas ngadto sa kabarangayan para mahan-ay ang pag-apud-apod sa ayuda.
Si City Administrator Floro Casas Jr. nagkanayon nga dili molapas sa P2,300 ang presyo sa matag 50 kilos nga premium rice, ubos kini og P170 itandi sa ilang unang gipalit.
Si Casa nipasabot nga naka-canvass sila og ubos nga presyo sa bugas sanglit daghan na og supply ang niabot sa dakbayan.
Si Mayor Edgardo Labella nimando sa pagpalit og dugang 150,000 ka sakong bugas para ihatag ngadto sa kapin o kulang 200,000 ka pamilya niining panahon sa ECQ sa dakbayan.
Kini maoy ikaduhang pagpanghatag sa Cebu City og tag 25 kilos nga bugas isip relief goods ug lain usab nga P130 milyones cash mga gihatag sa mayor ngadto sa 80 ka barangay niadtong Abril para gihapon sa relief goods labi na sa pagbalik sa enhanced community quaratine (ECQ) nga daghang padayon nga wala makabalik sa trabaho o nawagtanan og trabaho tungod sa pagpanira sa mga kompaniya.
Naglaum ang mayor nga dili magdugay ang ECQ uban sa kooperasyon sa katawhan ug mabalik na sa bag-ong normal nga kinabuhi.
Nanawagan ang mayor sa kooperasyon sa tanan ning panahona. (PAC)